Ka All Jaintia Muster Roll Workers’ Union (AJMRWU) mynta ka sngi ka 28 tarik Risaw 2025 ka buh por shi taiew ia ka sorkar Meghalaya ba kan pynkiew dor ia ka bai nong bylla sngi katkum ka Minimum Wages Act bad kumjuh halor ka jingbym ai ka VDA kaba treikam naduh 1 tarik Risaw 2023 haduh 31 tarik Nohprah 2024.
Haba kren sha ki lad pathai khubor mynta ka sngi ha Shillong Press Club hadien ka jingwankynduh ia u Commissioner ka tnad labour u Vijay Kumar, na ka liang u President ka All Jaintia Muster Roll Worker Union u Ma Khroo Pariat u la pynpaw ia ka jingsngew bynniaw kaba jur halor ka jingpynslem ka sorkar ban siew ia ka bai bylla kaba dang sahteng bad ka jingbym ai ia ka jingpynbna ba thymmai ia ka VDA (Variable Dearness Allowance) kaba treikam naduh ka 1 tarik Risaw 2023 haduh 31 tarik December 2024.
U bah Pariat u la ong ba ka seng ka la dep ban leit ia kynduh saw sien bad ki ophisar jong ka tnad Labour bad Finance, hynrei haduh mynta kam pat don kano kano ka jingthoh jingpynthikna na ka sorkar halor ka jingsiew ia ka arrear ne ka jingpynkylla ia ka VDA.
U Ma Khroo Pariat u la pyntip ba ka sorkar mynta ka sngi ka la pan por shibnai, ka seng ka la kyntait ia katei ka jingtyrwa, da kaba ong ba ki la dep ap la jan shisnem pura.
“Ngi ai por ia ka sorkar tang shi taiew ban ai jingpynshai da ka jingthoh — la kin siew ia ka pending arrear bad pyntreikam ia ka VDA ne em. Ngim kwah ban leit iakhih, hynrei ngim lah ban ap shuh”, la ong u bah Pariat.
U la maham ba lada ka jingpynshai kam wan da ka jingthoh, ka seng kan sah sa tang ar tylli ki lad kata ka long ban pynsangeh lut ia ki kam Muster Roll bad ka leit sha ïing Kashari namar ka sorkar ka la pynkheiñ ia ka aiñ jong ka bai bylla katkum ka Mininmum Wages Act 1948.
Ka seng ka la khot ia ka jingialang jong baroh ki Muster Roll bad ki nongtrei kontrak ha ka 3 tarik Naiwieng 2025 ha ka por 10 baje mynstep ha Shillong Press Club.
