Ka Nongrim Hills ka la ïoh ban pynkut ia ka program ïalehkai na ka bynta u snem 2024 da ka jingjop don burom, kata da 6-0 ha ka jingiakhun pyrshah ia ka Ryntih FC ha madan SSA stadium Polo Shillong.
Katkum ka jingpynbeit jong ka Shillong Sports Association (SSA), ia ka jingialehkai na ka bynta kane ka lympung Shillong Premier League (SPL) yn bteng biang ha u snem thymmai kata da ka jingiakhun hapdeng ka Rangdajied FC pyrshah ia ka Nongthymmai SC ha ka 4 tarik Kyllalyngkot 2025.
Ha katei ka jingiakhun, ka Nongrim Hills ka la ioh ban pynkhih jar nyngkong lyngba u Nickhil Lyngkhoi ha ka minit ba 10. U Banshemphang Kurbah u la ioh ban thep 2 kol ha ka minit ba 38 bad 67, 1 kol na u Benjamin Diengdoh ha ka minit ba 55, shi kol na u Glennys Lynrah ha ka minit ba 81 bad shi kol na u Fashioning Syngkli ha ka minit ba 88.
Hadien 8 tylli ki jingïalehkai, ka Nongrim Hills ka la kiew sha ka kyrdan ba 3 katba ka Ryntih ka dang neh mynta ha ka kyrdan ba khatduh (3 poiñ) na 9 tylli ki jingïalehkai.
