U MLA ka Nongthymmai Constituency, Bah Charles Pyngrope, u la ong ba ka bun na ki Minister ki ba don ha ka Sorkar jylla ki dei ki nongshong shnong ha Nongthymmai hynrei ka surok ha kane ka shnong ka dei ka ba sniew tam, ia kane ka mat u MLA ka Nongthymmai u la wanrah ha ka jingkylli bynrap hapoh ka ïingdorbar mynta ka sngi palei.
Haba jubab ia kane, na ka liang u Symbud Myntri Rangbah ka jylla, u Bah Prestone Tynsong, u la ong ba ka Sorkar kan dang pynkhreh ia ka mang tyngka na ka bynta ban pynbha ia ki surok hapoh ka Nongbah Shillong.
Na ka liang u Bah Charles Pyngrope u la ong ba u kwah ba ka Sorkar kan ai 5 klur na ka pynta ban pynbha ia ka surok ha ka constituency jong u.
“Bun na ki Myntri ka sorkar jylla ki dei ki ba sah ha kane ka Constituency hynrei ki surok ha Nongthymmai ki long ki ba sniew bha, lait noh tang ka surok na ïing u Symbud Myntri Rangbah sha ïing jong nga ” ong u Bah Pyngrope.
U la iathuh ba u Symbud Myntri Rangbah u ba long ruh u Myntri ka Tnad PWD u Bah Prestone Tynsong, u Symbud Myntri Rangbah u ba long ruh u Myntri ka Tnad urban affairs, u Bah Sniawbhalang Dhar, u Myntri ka Tnad Animal Husbandry & Veterinary, u Bah AL Hek, u Myntri ka Tnad Food Civil & Supplies u bah Comingone Ymbon, u Myntri ka Tnad PHE, u Marcuise N Marak, ki dei ki ba don ka ïingsah ha Nongthymmai constituency.
U Bah Tynsong u la pynksan da kaba ong ba ka jingthmu jong ka Sorkar jylla bad ka tnad ka long ban pynthikna ba baroh ki surok ha Nongbah Shillong kin long ki ba bha.
“Nga la dep ban bthah ia baroh ki engineer ban leit jurip ia ki surok ha Shillong, khnang ba lah ban pynmang pisa na ka bynta ban pynbha noh ia kine ki surok ” jubab biang u Bah Prestone.