Ka Khasi Students Union (KSU), East Jaiñtia Hills Disrict Unit (EJHDU), lyngba ka kyrwoh ba la phah da u Secretary, u bah K.S. Suchiang, ka la pynrem jur ia ka jingleh riewkhlaw jong ki shipai BSF kiba ieng pahara ha u surokbah NH-6 harud jong ka jingkieng Sonapyrdi, kaba don ha ka lad ban leit sha shnong Huroi, ha kaba ki la bom bad tied pathar ia ki riew paidbah kiba na ka thaiñ Narpuh ha kaba lai ngut na ki, ki la mynsaw bad ki shipai ki la tied ruh ia ki ar tylli ki kali jong ki haduh ba ki ïit kali ki la pait, kane ka jingjia ka la jia hynnin ka miet ha ka por kumba 9 baje mynmiet.
Ka kyrwoh ka iathuh ba ki shipai BSF hadien ba ki la dep ban tied ia ki kali, ki la kynnoh bad pharep kylla pynban ba dei ki trai kali hi kiba la tied ia ki ïit kali.
Ka seng ka pynpaw ia ka jingsngew bitar ia kane ka jingleh kitei jong ki shipai BSF namar ba kaba kum kane ka jingshah bom shah tied ki briew na ka thaiñ Narpuh ka la jia la bunsien “Na ka liang ka seng man ka por ngi la ju leit ban ujor bad buh ruh ki shithih ujor sha ophis u Deputy Commissioner ka East Jaiñtia Hills District ha kaba ngi la dawa ruh na ka sorkar ba ka dei ban weng bad pynkynriah noh ia kitei ki shipai iada khappud (BSF) kiba ieng pahara ha katei ka jaka ha jingkieng ha Sonapyrdi, ha ka jingshisha ka sorkar ka la dei ban phah ia kitei ki shipai sha ki bynta khappud ym ban ieng pahara ha surok bah national highway” la bynrap u bah K.S. Suchaing.
“Ka seng ka sngewkhia jur ia kane ka jingleh riewkhlaw ki shipai BSF kiba ju pyni bor man ka por ia ki riew paidbah kiba dei ki trai ri trai muluk, katba ia ki dkhar Bangladesh kin nud ban pyni bor” la bynrap utei u nongialam ka KSU-EJHDU.
Kumta halor kane ka jingjia kaba ju jia ruh man ka por, ka KSU East Jaiñtia Hills District Unit shen kan sa khot pynlong da ka jingialang, ka Executive Committee ha ka 23 tarik mynta u bnai ba kan ia shong pyrkhat halor kane, namar ka seng hi kam kwah shuh ban dang iohi ba kaba kum kane ka jingshah shoh shah bom ki riew paidbah kan dang jia ha katei ka jaka ha jingkieng ha Sonapyrdi, la pynkut ka kyrwoh na ka seng.
