Ki nongialam ka Hynniewtrep Border Disputes Redressal Forum (HBDRF) ha ka 20 tarik ki la ioh ban shnong jingialang bad u Myntri Rangbah ka jylla u Conrad K Sangma ban iakren halor ka jingia khajia pud ka Meghalaya bad Assam.
Ha kane ka jingialang la khlieh da u Myntri Rangbah u Conrad K Sangma ha ka jingiadon lang u bah Cyril V Diengdoh, FR Kharkongor.
Na ka liang ka Hynniewtrep Border Disputes Redressal Forum (HBDRF) la wan mihkhmat da u Chandame Sungoh u Chairman ka HBDRF, u bah Thomas Passah, u bah Erwin Sutnga bad u bah MM Thaiang.
Haba kren sha ki lad pathai khubor U bah Thomas Passah u la ong ba na ka liang jong ki, ki la ioh ban pynsngew halor ka jingkynduh jingeh ki para Khasi kiba sah ha block-1 haba iadei ka Humans Right Commission, ba ki nongshong shnong jong ngi kim don ia ki ST certificate, Adhaar cards bad ki PAN card.
Shuh shuh ki la pynpaw ruh halor ka jingdonkam ki briew kiba sah ha kitei ki jaka ba ki donkam ia ka surok bad ki jaka ai jingsumar bad shibun kiwei kiwei ki kam pynroi ki ba dang donkam ha kitei ki thaiñ.
U bah Thomas u la ong ba ha ka jingiakynduh bad u Myntri Rangbah ka sorkar jylla mynta ka sngi, u la ong ba ka don ka jingkyrmen ba kan seisoh, ha kaba u Myntri Rangbah u la kular ban shimkhia ban iakren iakane bad u Myntri Rangbah ka sorkar jylla Assam.
Na ka liang u bah MM Thaiang u la pynpaw ba kane ka jingialang halor ka kam ia khajia pud u la ong ba um pat lah ban ong ei ei katba ym pat iohi ia u soh jong ka sorkar.
U la pynpaw ba na ka liang jong ki, kila dep phah ruh ia ka Memorandum markhmat bad u Amit Shah. Ha ka jingiakren bad utei u Myntri ka sorkar pdeng te ka sngew ba ka long kaba seisoh hynrei haduh mynta ym pat iohi ia u soh jong ka jingkular ka sorkar .
Shuh shuh u la bynrap ba na ka por sha ka por la ju iakren ban pynphai ia ka Block1 Block 2 namar kam don da ka jingpynbna hynrei la shu klun jubor da ka Assam bad haduh mynta ruh kam pat don kano kano ruh kaba shai hapdeng ka Assam bad Meghalaya.
Ha ka jingialang u la pynpaw ba ka long kaba sngewtynnad na ka jingkren u Myntri Rangbah watla kata ruh ym pat lah ban ong eiei namar katba ym pat iohi ia ki soh jong ka jingtreikam.
Na ka liang ki nongialam ka HBDRF ki la ioh ban aiti ia ki sakhi ki dulir sha u Myntri Rangbah bad na ka liang u Myntri Rangbah ruh u kular ba un sa shimkhia ia kane ka bynta da kaba iakren bad u Myntri Rangbah ka jylla Assam.
