Ki Paidbah nongshong shnong ka sor Jowai hynnin ka sngi 1 tarik u Kyllalyngkot, kum ka dak ban pdiang sngewbha bad pdiang burim ïa u snem thymmai-2025 kila ïamih paidbah ban pynlong ïa ka jingshad kmen hapdeng ka jingshong shit naduh ki longkpa, ki longkmie, ki khun samla bad ki hep kiba rit.
Kumba ju long manla u snem haka shitarik ka sngi ba nyngkong u snem thymmai baroh ki dong ne shnong ki pynlong ïa ka jingïashad sngewbha hadien ba kila dep ban ïabam khana bad wan ïuhkjat tiap ha Ïawmusiang ban pynpaw ïa ka jingsngewkmen ban pdiang sngewbha ïa u snem thymmai.
Ïa kane ka prokram ha Iawmusiang kaba la tip kum ka ‘Community New Year Celebration’ la pynlong da ka Synjuk ki Waheh Shnong Jowai ha ryngkat ka jingïatreilang bad ka ophis jong ka DTO, ka District Tourism Promotion Society jong ka sorkar jylla bad ki bor pynïaid District jong ka West Jaiñtia Hills.
Baroh ki dong kiba la wan ban ïashim bynta ha Iawmusiang ki don haduh 18 tylli ba kynthup ïa ka 1. Khimusniang, 2. Chutwakhu, 3. Ladthadlaboh, 4. Tympang Iawmusiang, 5. Lion Mission Compound, 6. Mynthong, 7. Tpep-pale, 8. Dongmihsngi, 9. Khliehmyngkrem, 10. Khliehiongriang, 11. Myntdu Pynthornein, 12. Salaroh, 13. Loomsooiung New Hill, 14. Moosalyngkat, 15. Mookyrdup, 16. Lumpariat, 17. Panaliar bad ka 18. Caroline. Haka juh ka por la sam ruh ïa ki syrnot (Certificate) sha manla ki dong kiba la poi ha Iawmusiang bad ïa ka pisa la pynbna ba yn sa ai hadien sha kitei ki dong kiba la wan ban ïashim bynta.
Na ka liang ka Synjuk ki Waheh Shnong Jowai ha ka sien ba nyngkong ban pynlong ïa kane ka ‘Community New Year Celebration’ kala ai ka jingkitbok kitrwiang sha baroh kitei ki dong lyngba jong une u snem thymmai 2025 un wanrah ïa jingbha jingmiat, ka jingïatylli bad ka roi ka par ha baroh ki liang jong ka sor Jowai.
