Poi 12 tylli ki rot ha Wah Biar Aitnar
Ka lehñiam Behdeiñkhlam jong ka Seiñ Raij Mukhla mynta u snem 2023 ïa kaba la sdang naduh ka 15 tarik u Nailar, kala poi sha kaba kut mynta ka sngi 18 tarik ha pung Aitnar Mukhla hapdeng ka jingshongkun bad ka jingiphuh iphieng.
Mynta ka sngi la sdang ïa ka lehñiam Behdeiñkhlam naduh ka por mynstep ha kaba la don ka jingkynting ïa ki Deingkhlam ha ‘Iung Blai’ bad ka shad ka kñia da ki Waheh, katba ha ka por mynsngi la don ka jingïakynduh ki rong ki rup ha madan Slotmasi bad ka jingpynpoi ïa ki Diengkhlam bad ki rot 12 tylli ha Wah Biar (Aitnar).
Na ka liang ki khun ka Seiñ Raij Mukhla ki la wanrah ïa ka rot ha pung Aitnar ha ryngkat ki khubor bapher bapher. Na ka liang ka Seiñ Raij Mukhla ka kyrmen skhem lyngba ka jingpyndep ïa kane ka lehñiam ba khadduh kan wanrah ïa ka bha ka miat bad ka roi ka par ha baroh ki liang.
Ha kane ka sngi pynkut ïa ka Behdieñkhlam ka Seiñ Raij Mukhla la wan sakhi lang da u Symbud Myntri Rangbah ka sorkar jylla u ma Sniawbhalang Dhar, u MLA ka Jowai ma Wailadmiki Shylla, u Superintendent of Police ma C. Syrti, u DC ka West Jaiñtia Hills District bah B.S. Sohliya, IAS, u Dolloi ka Elaka Jowai ma Puramon Kynjing, ki MDC, ki waheh wasan jong ka Raij nalor kiwei de.
