Ka Seng Rangbah Catholik jong ka Parish Yongshiwiat, Jowai Diocese West Jaintia Hills District, ka la pynlong ia ka jingiaseng ialap jong ka ha ka Balang shnong Mooker ha kane ka 4 bad 5 tarik December (Nohprah) 2021, ha kaba ki dkhot jong ka Seng kiba hapoh ka Parish, ki la iawan shim bynta shongshit naduh ka janmiet jong ka 4 tarik sha kane ka jingiaseng ialap. Ha shwa ban pynlong ia ka jingiaseng ialap ha ka por janmiet, ki dkhot jong ka Seng ki la phiah ha ki kynhun kynhun ban leit jngoh iing. Ha kane ka jingleit jngoh iing. Ha kane ka jingleit jngoh iing na ka liang ki dkhot ka Seng Rangbah,ki laiohlad ban tip ia ka khia ka shon jong ki bad ki la kyntu kynpham,ia kyntu ia kynrong ia ka khia ka shon jong ki.
Ha ka sngi u Trai, 5 tarik por 10 baje mynstep la don ka jingknia Mass bakhuid ba la knia da u Phadar Thawmonlang Sutnga, Asst. Parish Priest jong ka Parish Yongshiwiat, ha kaba ki dkhot jong ka Seng bad ki para-bangeit na ki shnong bapher bapher jong ka Parish ki la ia wan shim bynta shongshit bad ioh bynta ha ka iabam iasib ia u Kpu u Rynsi uba long ka Met bad ka Snam jong u Jisu Khrist. U Phadar Thawmonlang Sutnga haba kren ha kane ka sngi, nalor ka jingbatai kaba bniah shaphang ka Ktien ka jong u Blei, shaphang ka Aiom Advent, ka jingpynkhreh ia ka Khristmas,u ai ruh ia ki kyntien sneng kyntien kraw kiba sngewtynnat ia ki Rangbah bad ia ki para-bangeit kiba la wan sha kane ka jingiaseng ialap.
Ha ka nohphai sngi ha shwa ban ioh ia ka jingkyrkhu da ka Sakrament bakhuid tam ka Duwan, la ioh ia ka jingkren kaba sngewtynnat da u ma M.M.Thaiang, President ka St. Vincent de Paul, Jowai Area Concil Diocese Jowai. Uma Thaiang haba kren ha kane ka sngi, u la ai ,ki symboh pyrkhat halor ka phang “ ba ngi dei ban long ki ‘riew duwai, ka jingiapher hapdeng ka jinglong ki Kpa bad ka jinglong ki Rangbah, ka jingim babha da ki kam hala iing hala sem, ha ka shong ha ka thaw, ha ka imlang ka sahlang, ha ka Balang bad ha ka kam pynphriang ia ka Khubor babha.”
La pynkut ia kane ka sngi da ka jingmane Sakrament, da ki jingduwai ba kyrpang na ka bynta ki jingthmu bapher bapher ban bha ban miat ka longbriew manbriew bad khatduh la ioh da ka jingkyrkhu ba kyrpang da ka Sakrament bakhuid tam ka Duwai na kti u Phadar Thawmonlang Sutnga, Asst. Parish Priest jong ka Parish Yongshiwiat.