Ki Samla pule kiba la pyndep ia ka jingpule Pharmacy hynne ka sngi ka 11 tarik ïaiong ki la wan ha Shillong Press Club ban pyntip sha ki lad pathai khubor halor ka jngsngap mynthi ka sorkar haba ïadei bad ka lad iohkam ioh jam jong ki.
Haba kren sha ki lad pathai khubor na ka liang u Samla Emos John Syiemlieh u la pyntip ha ki snem ba la dep ki la iakynduh ia ka Myntri ka tnad ka koit ka khiah ban pynsngew ha ka haba ïadei bad ka jingkynduh jingeh ki samla pule pharmacy, hynrei haduh kine ki sngi na ka liang ka sorkar ka sngap mynthi bad kam shim la leh ei ei.
Na ka liang ki Samla pule Pharmacy ki kyrpad ia ka Sorkar bad kumjuh ia ka Myntri ka tnad ka koit ka khiah ban shimkhia ia kaei kaba ki samla pule Pharmacy ki la dep ban pynsngew ha kaba ïadei bad ka jingthung kam Pharmacy ha man la ki PHC, CHC, bad kumjuh ha ki Hospital bad ki District ruh kumjuh ban thung shuh shuh ki Inspector ha ka man la ki District.
Shuh shuh ki la kyntu ia ka Myntri ba ka lawei ka ri ka shong ha ki khynnah samla wat pynbor ban shim pat da kiwei ki sienjam la ngin leit sha ka ïingshari ne pynbun da ki jingiakhih.
Shuh shuh u samla Emos u la pyntip ba lyngba ka RTI la lap ba ka Meghalaya Pharmacy Council naduh u Snem 1996 haduh kine ki sngi kiba mynta kim shim pat pynthymmai ia ki nongkitkam bad ki dawa ban sei madan ia ki nongkitkam ka Meghalaya Pharmacy Council namar dei kane ka council kaba pyniaid lut ia ki kam ki jam baroh naduh ki Registration bad kiwei kiwei ia kane ruh ki la shu ieh khongreng.
Khatduh khatwai u la ong kine baroh ka dei beit ka jingbym shimkhia bad ka jingleh meinah ia ki samla ba pule pharmacy bad u la ong wat shim ia kane ka kam tang ban ialeh khun jakai, namar kane ka dei ka kam kaba Kongsan kaba u paid ka bri u Hynniewtrep u pyndonkam ia u Dawai.