Ia ka jinglyngkhu snem ba 30 jong ka Shillong Press Club (SPC) bad ka jingrakhe National Press Day la rakhe mynta ka sngi ha ka ophis treikam ba thymmai jong ka Club kaba don ha ka building jong ka Director of Information and Public Relations, Shillong kaba la plie paidbah ruh mynta ka sngi da u Myntri Rangbah ka jylla u Conrad K. Sangma.
Ia ka Shillong Press Club la sdang naduh u snem 1992, ha pdeng kine ki laiphew snem jong ka jingiaid lynti ka Club ka iakynduh shibun ki jingeh. Watla ia ki lad pathai khubor la kheiñ kum kita ki rishot ba saw (Fourth pillar) jong ka jingsynshar paidbah, hynrei ki nongthoh ne nonglum khubor ki iakynduh shibun ki jingduna bad ki jingeh ha ka jingtreikam jong ki. Hynrei ki nonglum khubor jong ka jylla ki long kiba kloi ban shah ia kine ki raieh raidam bad lyngba ka jingiaishah kila ioh ruh ban kheit ia katto katne ki jingmyntoi na ka sorkar kum ka jingpynioh ia ka jaka trei ba pura hapoh kane ka Building jong ka ophis DIPR.
Hapoh ka jingialam jong u bah David O Laitphlang kum u President ula lah ban wanrah shibun ki jingkylla hapoh ka SPC bad dei lyngba ka jingtreishitom jong u la lah ban pynioh ia kane ka jaka trei ba pura jong ka Club, kala la pynbiang ia ki jingdonkam baroh da ka sorkar.
Ia kane ka ophis thymmai la plie da u Myntri Rangbah u Conrad K. Sangma ha ka jingiadonlang ki heh sorkar ba kynthup ia u Prabin Bakshi, Commissioner and Secretary, u Israel Ingty, Secretary bad u M. Sangma, Director of Information and Public Relations, Meghalaya kumjuh u dkhot rangbah jong ka Press Council of India u Jaishankar Gupta.
Ha kane ka ophis thymmai la pynbiang ia ki jingdonkam kum ka Conference Hall ba don lang ki kor sawa bad ki LED projector, ki shuki, ki miej na ka bynta ban ioh pyndonkam ki nongthoh khubor, ka jingdon ki internet connection ba biang bad kiwei de ki jingdonkam.
Ban pynitynnad shuh shuh ia kane ka ophis treikam thymmai ka SPC kala khot ia ki nongdrodur ba paw jong ka Riti Academy ban ai ia ki jingdor jong ki, kiba iadei dur bad ka jingrakhe ia ka jingdap 50 snem ka jylla Meghalaya.
Ha kaba iadei bad kane kala don ka jingdrodur ha ki lai bynta, ha bynta ba nyngkong la dro ia ki dur jong ka kynhun Myntri ba nyngkong duh jong ka Jylla ha ka por ba ioh ia ka jylla ba pura ha u snem 1972 ka dur jong u Capt. Williamson A Sangma, Chief Minister bad ki wei pat ki ministers kum u bah B B Lyngdoh, Edwinson Bareh bad S D D Nichols Roy.
Ha ka bynta ba-ar kala don ruh ka jingdrodur ia ki riew pawkhmat ha ka sorkar kiba don bynta ban wanrah ia ka roi ka par hapoh ka jylla kum ki jong u Prof Radhon Sing Lyngdoh, Martin N Majaw, P Ripple Kyndiah, and Peter G Marbaniang.
Ha ka bynta ba-lai pat la dor ia ki dur jong u Hoover Hynniewta, u Darwin D Pugh, u Stanling D Khongwir bad u Sanford K. Marak.
Ban pynitynnad shuh shuh ia ka kamra ka SPC ha ki por ban sa wan kan sa buh shuh shuh sa ia kiwei pat ki dur jong ki nongialam kiba don bynta ha ka jingialeh ban ioh ia ka jylla ba pura.
Na ka liang jong u Myntri Rangbah ula pynpaw ka jingiaroh ia ka SPC kaba la iaid lynti haduh une u mawmer ba 30. Ula iaroh ia ka jingtreikam jong ki nongthoh khubor da kaba ong ba ki dei shisha kita ki Rishot ba Saw jong ka jingsynshar paidbah, kiba lah ban wanrah ia ka jingsynshar kaba shai bad ba khuid ba suba jong kano kano ka sorkar, kumjuh ruh ban pynioh ia ki khubor sha ki paidbah. U Sangma u la ai khublei Christmas bad snem thymmai ba suk ba kmen ia baroh ki dkhot jong ka SPC.
(Katto katne ki dur kiba la dro ha ophis treikam ka SPC)
