U Thomas A. Sangma, Lamphang ka ïing Dorbar Thawaiñ ka Jylla u la pyntikna ba ka VPP ka la dep ban ai ia ka Shithi sospon ia u Bah Adelbert Nongrum na ka Party Voice Of the People’s Party (VPP) bad ba u Bah Adelbert ruh u la wanrah ia ka shithi ban kyntu na ka bynta ban kyntait ia ka Shithi sospon na ka VPP.
Lah ban pynkynmaw hangne ba ka VPP ka la phah ia ka Shithi sospon sha u Bah Adelbert ha u bnai Lber 2025 bad na ka jingbym hun jong u ba ka Party ka khlem thoh shai ia ka kyrteng bad ka kyrdan jong u, kata kum u Nongmihkhmat (MLA North Shillong), u Bah Nongrum u la phah ia ka shithi ban kyntu ia u Lamphang ban kyntait noh ia ka shithi na ka VPP halor ka jingbym kheiñ snep ia u bad ka long ruh kaba pynklumar ia ki paidbah ioh lehse kin don ki kyrteng kiba long kumjuh, kiba sah hapoh jong u pud ka North Shillong Constituency.
Ha kaba iadei bad kane ka jingkyrpad na u Bah Adelbert, u Lamphang u la kubur ha kaba iadei bad kane ka liang namar ba ka jingleh jong ka VPP ka dei kaba bakla namar u Bah Nongrum u dang bat mynta ia ka kyrdan kum u MLA bad ka jingbym thoh shai ka long kaba ym lah ban pdiang, kane ka lah ban poi jngai lada wanrah sha ka ïing Kashari, ong u Lamphang.
Shuh shuh u la ong ba ia kane ka mat, u Lamphang u dang bishar bad tih bniah mynta bad ia kaba mynta ym pat lah ban ai ia ka jubab kaba biang, kata ban pdiang lane kyntait noh ia ka jingkyrpad jong u Bah Adelbert.
