Ki nongïalam ba hakhmat jong ka seng treimon sngewbha ka “Khooid Ya ka Wah Myntdu” (KYM) hadien ka jinglum ïaka jingïalang paidbah (Dorbar) kaba la long mynta ka sngi nyngkong 3 tarik u Jylliew ha ïing Dorbar jong ka Dorbar Shnong Chilliang Raij Jowai, kila pynsngew kum ki nongïalam “Ngin ïakhun ban pynïoh ïaka hok jong ka Wah Myntdu kaba la dep ban shah pynjulor ha kine ki sngi bala dep”.
Mynta ka sngi ki nongshong shnong kiba don ha talawiar jong ka ‘Wah Myntdu’ kila wan poi sha kane ka jingïalang bala khot pynlong da ka “Khoid Ya ka Wah Myntdu”, kila shim bynta lang ban ïakren sani ïaka jingbha jingmiat jong ka Wah Myntdu kaba long ka nongbsa um bam um dih ïa ki nongshong shnong.
Ha kane ka sngi kila don kumba 235 ngut baroh kiba wan ïashim bynta kynthup naduh ki Waheh Shnong, ki longkmie, ki longkpa, ki trai hali, ki nongrep bad ki khun samla shynrang bad kynthei bad ïaka jingïalang la pynïaid da u ma Khroo. L. Pariat.
Na ka liang ka Dorbar kila shim ïa ka rai ban pynbha pynmiat ïa ka Wah Myntdu da kaba khang ba ym bit ban bret pathar ïa ki plastic, ki ñiut kiba mih na ki ïing ki sem katkum ki hukum bala pynbna da ki Dorbar Shnong.
Yn khang ïaka jingbret pathar ïaka khyndew na ki bynta ba pyntrei ïaka surok, khnang ba kyndew kam ïoh lad ban tap ïa ki pynthor kba, haki bynta jong ka Pynthorneiñ bad Pynthorwah ka Wah Myntdu.
La buh ka jingkyrpad ïaka Sorkar jylla ban kan phah khlong noh mar mar ïaka khyndew kaba la pyndap ïa ki hali bad ka Sorkar kan siew ïa ka bai lutkswa jong ki hali kiba la duh ïa u kba u khaw.
La kyrpad ïaka Sorkar ba kan khlong noh ïa ka khyndew kaba la pyndap ïa ka Wah Myntdu khamtam haki bynta ba ring ïa ka um bam ha ‘Moopiah’ da ka tnad PHE Electrical. Kumjuh ruh dei ban khlong ïa u shyiap u ba la dap ha shi lynter ka Wah Myntdu kaba la ktah wat ïa ka jingim jong ki dohum dohwah.
Khnang ban pynïoh ïaka hok jong ka Wah Myntdu bad ïaki nongshong shnong kiba don ha talawiar, la pynkhlaiñ shuh shuh ïaka kynhun ‘Khooid Ya ka Wah Myntdu’ da kaba pynrung dkhot ïa ki riew shemphang ban pyrkhat sani bha kumno ban pynrung haki nongshong shnong ba kin don ka jingkitkhlieh ïaka Wah Myndtu.
Ha kane ka Dorbar kane ka kynhun kala rai lada dawa ka kam, kin hap ban leit ujor noh sha ka ïing bishar jong ka Meghalaya High Court bad kumjuh sha ka NGT ban leh ïa kaba donkam halor ka jingshah pynjulor ka Wah Myntdu.
Ka seng KYM ka pynpaw ka jingsngewdiaw ba u DC ka West Jaiñtia Hills District uba long kum u Chairman West Jaiñtia District – Environment Protection & Restoration Fund, ba um shym la pyntreikam ïaka pisa kaba 5 lak tyngka ïa kaba ka seng KYM kala dep ban leit thep ha ka Account naka bynta ban pynbha ïaka Wah Myntdu.
