U Chairman jong ka Sur U Paidbah Ka Bri Hynniewtrep, u bah L.S. Thabah haba ai jingkren hadien ba la aiti ia ka jingkyrpad ha ka ophis u DC WJHD halor ban pynthikna ia ka Enrollment Election Photo identity Card, ia ki briew kiba la dep ban apply online, u la ong ba kane ka dei ka por ba biang tam ia ki sengbhalang bapher bapher ban wan rah ia ki briew jong ngi kiba don sha jylla Assam, ban rah noh ia ki shapoh ka jylla la jong. Kaba nyngkong u la ong ka EPIC bad hadien kane dei ban bud dien ia ki kam pynroi ha ki shong Khapppud.
U la ong ha ka jingiadei bad ka jingjia ha Mukroh ki nongialam jong ngi kim nud ang ei ei ha khmat ki nongialam jong ka Assam ne ban leh ei ei, ha kaba na ka liang ka Assam ka dang wan ban pynjot ia ki lynti leit briew jong ki briew jong ngi.
Shuh shuh u la ong ba ki briew jong ngi kiba sah ha ki thaiñ khappud kim shym la ioh kino kino ki kam pynroi na ka jylla Meghalaya kumjuh ruh na ka jylla Assam tang na ka daw bym don Epic, kumta na ka liang jong u bah Thabah u la kyntu jur ia ki bor District bad kumjuh ruh ia ka sorkar ban pynbiang ia kaei ba kitei ki briew ki donkam.
Na ka liang u ma Chandame Sungoh Chairman HBDRF haba kren u la pynpaw ka jingsngew pyrshah jur halor ka jingleh dusmon ka briew jong ka Assam ban pynjot ia ki lynti ki surok leit bri ne leit trei leit kta jong ki briew ka jylla, da kaba ki nong Assam ki la tih da ki thliew ha kitei ki surok ki lynti.
Mynta ka sngi la don lang ruh u ma Pyrkhat Shylla Chairman Sur U Paidbah Ka Bri Hynniewtrep West Jaintia Hills bad Kong P. Phawa.