Ka Seng Samla Shnong Umkiang (SSSU) ka pynpaw ka jingsngewkhia kaba jur halor ka jingkhlad kyndit jong u samla (L) Kynjaimon Amse uba na ka shnong Umkiang, East Jaintia Hills District bad ka kyrshan pura ruh iaka ejahar ba la ujor da u Kñi jong u (L) Kynjaimon Amse.
Ha u kyrwoh ba la phah da u President Seng Samla Shnong Umkiang Ma Ellend Mynthlu, ula ong ka Seng Samla Shnong Umkiang ka dap da ka jingsngewkhia ban duh noh ia u samla bad u nongaibuit jong ka SSSU.
“Ka jingkhlad kyndit jong u samla (L) Kynjaimon Amse ka long ka jingduh kaba khraw ym tang iaka ïing ka sem hynrei ia ka shnong bad seng Samla Shnong Umkiang hi baroh kawei”, ong u kyrwoh na u bah Ellend Mynthlu.
La bynrap ba ka Seng Samla Shnong Umkiang ka dang khmih lynti ia shibun ki synñiang na une u samla ban trei na ka bynta ka imlang ka sahlang bad ka District hi baroh kawei, hynrei ha kaba kum kane ka por kim don kyntien da kumwei pat, hynrei ki buh haka jingduwai ba U Trai Nongbuh Nongthaw un wan ban pyntngen iaka ïing ka sem bad ïa baroh kiba dang don ka jingiadei bad une u samla.
Haka juh ka por ka SSSU ka dawa ban pynioh ka jingbishar kaba hok ia u samla Kynjaimon Amse lyngba ka jingthohkit jong ki bor ka aiñ.
Lah ban pynkynmaw ba u samla Kynjaimon Amse uba dei u nongtrei mon sngewbha bad nongiasaid Aiñ uba ju kit ia ka khia ka shon jong ki paidbah ula khlad kyndit ha ka jingjia tyngkhuh kali kaba la jia ha ka step phyrngab jong ka 23 tarik Nailar ha ka shnong Dkhiah, East Jaintia Hills District.