Ka Hynñiewtrep Youths’ Council (HYC) War Jaintia Circle ka pynpaw ia ka jingsngewkhia halor ka jinglong jingman jong ka Surok Amlarem-Dawki NH-40 E ha kine ki kyndiat taiew namar ki truck kit dewiong jong kito kiba kam ba ki dei na ki High Level ki iaid sahuh, khlem jingsalia. Kane ka ktah shisha ia ka leit ka wan jong u paidbah babun balang khamtam kito kiba thmu ban leit sha ki jaka pule ne leit trei leit ktah bad khamtam kiba leit sha ki jaka sumar.
Kumta ka seng ka kyntu ia ki bor pyniaid District lane ia ka Amlarem Civil Sub-Division ba kin shimkhia bad ban leh eiei mardor halor kane ka jingiaid laitlan jong kitei ki truck kit dewiong, kumjuh ruh ba kin tuklar ha ka ba iadei bad ka jingkit palat pud (Over loading) ka ba la pynlong ia katei ka surok ba kan nangsniew kat dang mih ki sngi, nalor kata ka wanrah ia ka jingdheng kali ba manla ka por kaba lah ban wanrah ki jingjia ba sngewsih haba don kiba shitom ne pang.
Ka seng ka maham ruh lada jia ba ki bor District ne Civil sub-division kim shimkhia iakane ka jingkyrpad ka seng kan sa shong pyrkhat bad kan sa leh ia kaba donkam.
