Ki dkhot jong ka longïing longsem jong u parad Kelvinnistick Nonglamin bala 102 snem ka rta na ka shnong Nongtalang Khlachympa kaba hap hapoh ka 7-Amlarem LA Constituency kila pynpaw ka jingsngewkmen halor ka jingpynkup burom jong ka tnad Election Commission of India ia une u rangbah hynnin ka sngi kaba dei artad ka sngi burom ia ki riew tymmen (International Day of Older Persons).
Ia kane ka jingpynkup burom la pyndep da ka ophis Sub-Divisional Officer (Election), Amlarem Sub-Division, Amlarem kat kumba la bthah da ka Election Commision jong ka ri India. Ia kane ka bynta la pyndep da u bah Gameliel L.C. Mylliem, MCS Assistant Electoral Registration Officer (AERO), da kaba wan aiti ia ka Momento kaba don ka jingthoh kynmaw burom ia ka jingpyndep hok jong u parad Kelvinnistick ia ka kamram jong u kum u nongthep vote jong ka ri India haduh mynta ka kynti.
Ia ka jingialang la pynlong ha ïing sah jong u parad Kelvinnistick kaba u shong u sah ryngkat bad la ka para khadduh ka kong Shing Nonglamin. Ha kane ka sngi la iadon lang ki nongialam dong Nongtalang Khlachympa ba kynthup ia u Chairman ma Tenyson Rymbui bad u General Secretary ma Starwell Paduna nalor kiba ha ïing ha sem jong u kiba kynthup ruh ia ki khun ki kti, ki para ki pyrsa ba ki pyrsa ksiew.
Katkum ka jingiathuh jong kiba haïing ia u parad Kelvinnistick Nonglamin la kha ha ka 20/05/1920 ha ka shnong Nonglamin (ka shnong ba la jah) kaba don harum jong ka shnong Nongtalang bad mynta u la dap 102 snem ka rta. Une u parad ula shongthait na ka kam sorkar ha ka tnat PWD kum u Overseer (Sectional Officer/JE).