Ki ophisar bad ki nongtrei jong ka Raj Bhavan, Shillong mynta ka sngi ki la pynlong ia ka jingialang sngewlem halor ka jingkhlad noh khlem dei por jong ka Suman Chauhan, ka khun jong u Lat ka Jylla Meghalaya, u Phagu Chauhan, kaba la khlad mynta ka step ha AIIMS, New Delhi.
Ïa kane ka jingïalang la ïalam da u Principal Secretary jong u Lat ka jylla u Harish Chandra Chaudhary, IFS ha ryngkat ka jingïadon lang u Chief Electoral Officer ka jylla u Dr. B. D. R. Tiwari, IAS.
La pynlong ia ka jingai burom syntiew bad ka jingsngap jar ba ar minit na ka bynta ka mynsiem kaba la khlad noh jong ka Suman.
Ka Suman kala shong kurim bad u Gyanendra Singh Chauhan, ka la shah sumar na ka jingpang Cancer la lai bnai mynta haduh ba ka la khlad noh na kane ka pyrthei. Ïa ka jingleh niam ba khadduh jong ka yn pyndep lashai ka sngi ha ka jaka kha jong ka ha Prayagraj (Allahabad), ha Uttar Pradesh.
Ka la iehnoh shadien ia u lok, uwei u khun shynrang bad kawei ka khun kynthei.
