Ka Synjuk ki Waheh Shnong (SKWS), Jowai ha ba ai jingkren sha ki lad pathai khubor mynta ka sngi ka la pynsngew ba ka Synjuk kala pynpaw ka jingsngewnguh bad ka jingïaroh ïa ka ïingbishar ba don burom jong ka Meghalaya High Court kaba la pynmih ïa ka hukum halor ka Public Interest Litigation (PIL) No. 6/2022 kaba la bthat ïa ka tnad JHADC bad JMB ban kin leit kit bad pynkhuid noh ïa ki ñiut ba lumthup ha kylleng ki bynta jong ka sor Jowai.
Ka ïing bishar High Court kala pynmih ia ka hukum hynnin ka sngi 12 tarik u Ïaïong, 2022 hadien ka jingujor jong ka Synjuk ki Waheh Shnong, Jowai pyrshah ïa ka sorkar jylla, JHADC bad ka tnad Urban Affairs ha ka 7 tarik mynta u bnai bad ïa kane ka mokotduma yn shong bishar biang ha ka 20 tarik u Ïaïong 2022.
Ka Synjuk lyngba u President ma Alan Niangti ula ong ka synjuk ka don ka jingkitkhlieh ïa ka khuid ka suba jong ka sor Jowai, kumta kala shim ïa kane ka rai ban ujor sha ka ïingbishar ba donburom jong ka Meghalaya High Court halor ka jingeh ba ki paidbah nongshnong shnong ka Jowai ki iakynduh.
Ka Synjuk ha ka juh ka por ka khot ïa ka jingïatreilang jong ki paidbah nongshong shnong ba kin ym bret pathar ïa ki ñuit kat shaba lap namar ïa ka sor Jowai la ker talawiar ïa ka da ka Wah Myntdu kaba dei ka nongbsa umbam umdih ia baroh.
