Halor ka jingshah lynshop mariang kaba la jia ha u bnai Jylliew mynta ka snem kaba la ktah shibun ia ki Hali jong ki nongrep jong ka thaiñ Laskeiñ, na ka liang jong ka BJP Kissan Morcha kala leit ban kyrpad ia u BDO ka Laskeiñ u Dr. Bright Star Langbang ha kata ka por na ka bynta ban pynioh jingiarap ia kitei ki nongrep bala shah ktah.
Kumta na ka liang jong u State Secretary ka BJP Kissan Morcha u Heiborki Suchiang ha ka jingpyllait khubor mynta ka sngi ula ong ba na ka liang jong ka BJP Kissan Morcha ka la ioh jingtip ba ka ophis kala dep ban pynioh ia ktei ka pisa sha baroh ki nongrep kiba la shah ktah.
Kumta kala pynpaw ka jingsngewnguh kaba khraw ia kane ka ophis lyngba utei u BDO jong ka Laskeiñ C&RD Block uba la iarap ia ki nongrep jong ka thaiñ Laskeiñ da kaba pynioh pisa jingiarap ia ki lyng ki skhim jingiarap na ka sorkar, ha kane ka jingshah pynjulor ki Hali jong ki. U Heiborki ula kitbok kitrwiang ruh ia utei u ophisar bad ia ki nongtrei jong u ba kin nang lah shuh shuh ban ai ka jingshakri kaba khambha shuh shuh ia ki nongshong shnong ka thaiñ bad ka Jylla hi baroh kawei.