-Yn shna pynbha noh ïaka surok sha Urkhla Treatment Plan PHE-
Ka Dorbar Shnong Khimusniang, Jowai lyngba u Waheh Shnong ma T.S. Bamon ula pynpaw ka jingsngewnguh bad ai khublei ïa u Local MLA ka Jowai Constituency u ma Wailadmiki Shylla uba long ruh u Myntri sorkar ba dei peit ïa ka tnad ka koit ka khiah, kam ïalehkai bad kiwei de jong ka sorkar jylla uba la pynïoh bad ai jingïarap ïa kiba bun ki skim hapoh ka shnong.
Ki skhim kiba u ma Wailad Shylla ula lah ban pynioh ki kynthup ïa ka jingpynbha ïa ka lynti ïaid kjat ban jam sha shilliang ka wah Myntdu kaba tip ka “JINGKEIÑ NAR” kaba la jot rathai bad mynta kaba la dep ban maramot noh. Ka shnong kala ïoh ruh ki Scheme na ki Department sorkar bapher bapher ban ioh shna ïa ki Nala Duid, Motorable road, foot path bad kiwei de, na ka Jowai Municipal Board, Urban Affairs, Office u B.D.O Block Thadlaskeiñ bad na kiwei kiwei ki Departments bad kine baroh dei da ka jingïarap bad ka jingtrei shitom jong u MLA ban pynïoh ïa kine ki Skim.
Khlem da klet ïa ki por bad ki snem kiba la leit sha dien kum ka Dorbar Shnong Khimusniang, Jowai na duh ki nongkitkam shnong kiba long ki Ex- Waheh Shnong/Ex- General Secretary tad haduh ki nongkit kam shnong kiba mynta, kiba la trei shitom met bad mynsiem, ban leit wad ki lad ki lynti da kaba leit kynduh ïa ki ophisar, ki Ministers jong ki Department bapher bapher ban shna bad pynbha ïa kine ki Ar tylli ki surok kiba long kum ki maw kiba kah ïa ka dur bad ka jinglong jingman jong ka Shnong ha ka roi ka par.
Ka Shnong ka khlem shong thait ban sngap ïa ki jingud jingnam na ki nongshongshnong halor ka jingshem shitom jong ki na ka bynta kitei ki surok bad ïa kiwei kiwei de ki jingeh kiba ki ïa kynduh. Ka shnong da ki phew snem ka ïai shah bad buddien ïa kine ki ar tylli ki surok, kawei ka Surok na P.W.D. Road shaduh TP (Treatment Plan) PHE kaba don ha Khimusniang (Urkhla) kaba long ka Water Drinking ka shnong Jowai. Kaba ar ka Internal Road Khimusniang, Pohkseh ban pyniasoh bad ka P.W.D. Road kaba dei ka scheme Synod naduh u snem 2008.
Ka Dorbar Shnong Khimusniang, Jowai ha une u snem 2026 ka dap da ka jingsngewkmen ban pynbna paitbah sha ki khun ka shnong bad ki paitbah nongshong shnong ka West bad East Jaiñtia Hills District kiba leit ba wan shapoh ka shnong na bynta ka jingdonkam jong ki, ki ruh kin ïa kmen lang ban tip ba ïa une u Surok na P.W.D. Road shaduh TP (Treatment Plan) PHE kaba don ha Khimusniang (URKHLA) la sdang ban pyntrei noh ha kine ki khyndiat sngi ban wan, na ka liang ka PHE Department la dep ban alloted ïa ki contractor bad ha ka 9.3.2026, la sdang ban ai line ïa kine ki contractor da u S.D.O. Electrical Division PHE, Jowai bad u J.E. Electrical division PHE, Jowai ha ryngkat ka jingïadon lang u Waheh Shnong DSK, General Secretary DSK bad ki Dkhot ka Executive Body DSK.
Kumjuh ïa Ka Internal Road Khimusniang, Pohkseh towards P.W.D. Road kaba dei ka scheme Synod naduh u snem 2008 ruh yn pyntrei noh ha kine ki bnai ban wan bad ïa kiwei kiwei de ki motorable road, footpath etc kiba la dep trei, kiba dang trei mynta bad ki ban sa trei mynta u snem. Ka DSK sa shisien ka ai khublei kyrpang ïa u Local M.L.A ma Wailadmiki Shylla uba la sngap bad shah shkor ïa ka jingkyrpad ka shnong ban pyndep bad shna pynbha ïa kine ki surok, na ka liang ka DSK ka kyrpad ïa u MLA ba un dang bteng ban ai ïa ka kti kamon kti kadiang ïa ki jingïarap lyngba ki scheme/project ïa ka shnong bad ïa ka 2-Jowai Constituency hi baroh kawei.
Halor kine ki kam ka Dorbar Shnong Khimusniang, ka kitbok kit rwiang ïa u ma Wailadmiki Shylla ba u Blei un ai ha u ka met kaba koit kaba khia bad ka jingstad bad jingshemphang ban trei ïa ki kam na ka bynta ki kam pynroi ïa ki shnong ki thaw bad ïa ka State hi baroh kawei.
Ha ka juh ka por ka Dobar Shnong Khimusniang, Jowai ka khot ia baroh ki trai jaka kiba don bynta lyngba une u Surok Urkhla ba ki dei ban wan ïakynduh ïa ki bor pyniaid shnong ha ka sngi Saitjaiñ naduh ka por 8:30 haduh 10:30 baje mynstep ban ïakynduh lang ha u tei u Surok ban ïakren pynbeit shwa ban pyntrei noh ïa ka kam. Kino kino ki bym wan ka shnong kan ym lah ban pdiang ïa ki jingujor jong ki hadien habud.
