Ka Jaiñtia National Council (JNC), Khliehriat Circle haka kyrwoh na u General Secretary u Samla Symboh Sumer ka pynpaw iaka jingsngewnguh kaba khraw ia ka ïing treikam u Deputy commissioner ka East Jaiñtia hills khamtam iaka ADC ka madam Kharpuri halor ka jingshimkhia jong i ban pynurlong iaka jingkyrpad jong ka seng ban leh iaka screening live show jong uwei naki samla ka bri u Hynñiewtrep u Steve Jyrwa uba shim bynta ha kawei naki show ba pawkhmat ka Ri kata ka India best dancer season 4 bad u poi ruh haka kyrdan Top 6.
Ka seng myn hynnin ka Sngi ka 12 Tarik September kala leit ban iakynduh markhmat bad ka ADC ryngkat ka jingthoh ban kyrpad ban leh iaka screening live show haka DIPR large screen kaba don hapoh compound ka iing treikam u DC bad mynta ka Sngi lah ioh iaka jingbit ban leh iakatei ka screening.
Kumta ka seng ka ai ka jing khublei ia i madam Kharpuri iba la trei shitom ban pynlong kam iakatei ka kam babha. Ka jingleh ia katei ka screening kam dei tang ban pyni sngewbha hynrei kan long kum shibynta ban ai mynsiem iaka samla kiba don ka sap ka phong kumjuh ruh ban pynshlur iaki bam mih shakhmat, ong u Symboh Sumer.
Kumta halor kane ka seng daka mynsiem ba khia la kyrpad rit ia u paidbah jong ka thaiñ ban sngewbha ban wan peit ia kane ka show kum ka dak ban kyrshan ia u samla Steve kumjuh ruh ban tipbniah ba kumno ban ai ia ka vote naka bynta jong u lyngba ki mobile phone, khnang ba un poi sha ka thong bad un sa wanrah ruh iaka burom jong ka bri u Hynñiewtrep bad iaka jylla hi baroh kawei.
Yn pyni ia katei ka show naduh kane ka taiew ka Sngi saitjaiñ bad Sngi u Blei haka por 8 baje pm.