Ka Jaiñtia Students’ Movement (JSM) ha ka 19 tarik Lber 2026, ka pynpaw ia ka jingsngewnguh kaba khraw bad ka jingkyrmen kaba thymmai hadien ka jingïakynduh kaba don jingmut bad ka MLA Sutnga Saipung Constituency, kong Santa Mary Shylla, halor ka jingthmu ban seng ia ka Government College ha East Jaiñtia Hills District kaba la slem bha.
Ka jingdawa ban don ka Government College ha East Jaintia Hills ka dei kaba JSM ka la ïakhun naduh u snem 2015. Ha kine ki snem baroh, ka seng ka la trei shitom bha ban pynurlong ia kane ka jingdawa, da kaba sngewthuh ia ka jingdonkam kyrkieh ban ai ka jingnang jingstad kaba suk ban poi bad kaba lah ban siew da ki samla jong ka distrik. Watla ka East Jaintia Hills ka dei kawei na ki distrik kiba ai jingïoh khajna bha ha ka jylla, hynrei ka dang sah khlem don ka Government College, kaba la pynlong ia bun ki samla ban leit wad jingnang jingstad shabar ka distrik hapdeng ki jingeh kiba bun.
Ha ka jingtrei shitom kaba bteng, ka JSM ka la pynlong bun ki jingïalang paidbah, ki jingïalap paidbah bad ki jingïakhih paidbah ban pynpaw ia kane ka jingeh. Ka seng ka la bteng ruh ban ïa kren bad ka Sorkar Meghalaya da kaba ïakynduh ia ki nongïalam bad ai jingthoh ha kiba bun ki kyrdan.
Naduh u snem 2015, ka JSM ka la ïakynduh bun sien ia u Chief Minister barim, u Dr. Mukul Sangma, ban dawa ia ka jingthaw ia ka college. Hadien kane, naduh u snem 2018 bad shakhmat, ka JSM ka la bteng ban phah ki jingthoh bad ki jingai jingmut sha u Chief Minister ba mynta, u Shri Conrad K. Sangma, ban kyrpad ba dei ban leh mardor ia kane ka kam.
Ka seng ka la leit ruh sha u Deputy Chief Minister, u Shri Sniawbhalang Dhar, bad sha u Education Minister, u Shri Lahkmen Rymbui, ban pynpaw ia ki jingeh ha ka pule puthi jong ki samla ha East Jaintia Hills District. Shuh shuh, la ai ruh bun ki jingthoh sha u MLA jong ka Khliehriat Constituency, u Shri Kyrmen Shylla, ban pynpaw ia ka jingkyrkieh jong kane ka mat.
Ka JSM ka ithuh ba kane ka lynti kam shym la long kaba suk, hynrei ka pyni ia ka jingïatylli, ka jingkhlain mynsiem bad ka jingaiti lut jong ki samla bad ki paidbah jong ka distrik.
Ha kane ka bynta, ka JSM ka pynpaw ia ka jingsngewnguh kaba khraw bad kaba na ka dohnud sha ka Hon’ble MLA jong ka Sutnga Saipung, kong Santa Mary Shylla, na ka bynta ka jingtrei shitom jong ka kaba khlem sangeh, ka jingaiti lut bad ka jingïai bteng ban buddien bad ka Sorkar. Ka jingïalam jong ka ka pyni ia ka jingstad, ka jingrit mynsiem bad ka jingkitkhlieh kaba skhem na ka bynta ka bha ka miat jong ki paidbah.
Ka jingthaw bad ka jingtei kaba dang ïaid shakhmat jong ka Government College ha Jalaphet Bri-Sumer hapoh ka constituency jong ka, ka long ka sakhi kaba shai halor ka jingaiti bad ka jingïalam kaba treikam jong ka. Kane ka jingïoh ka pyni ia ka jingangnud jong ka ban wanrah ia ka roi ka par bad ki lad jingïoh jingnang jingstad sha ki paidbah.
Ka kong Santa ka la pyni barabor ia ka jingïalam kaba bha da kaba sngap ia ki jingeh jong ki paidbah bad trei shitom ban wad ki lad ki lynti ban pynbeit ia ki. Ka jingïohi jngai jong ka bad ka jingaiti ban kyntiew ia ka pule puthi ha ka thaiñ ka long ka nuksa kaba ai mynsiem ym tang ia ki paidbah ka constituency jong ka hynrei ia ka jylla Meghalaya hi baroh kawei.
Ka JSM ka ithuh ruh ia ki paidbah jong ka Sutnga-Saipung Constituency na ka bynta ka jingstad, ka jingïohi jngai bad ka jingskhem mynsiem jong ki ban jied ia ka nongïalam kaba shisha bad kaba tbit kum ma ka. Ka jingshaniah bad ka jingïatreilang jong ki paidbah ka la long ka nongrim kaba kongsan ban pynlong ia kane ka jingïalam kaba kiew shaphrang.
Ka JSM ka ngeit skhem ba ki nongïalam kum kong Santa, kiba don ka jingisynei, ka jinglong hok bad ka jingtrei shitom, ki long kiba donkam bha na ka bynta ka roi ka par jong ka imlang sahlang. Ka jylla Meghalaya ka donkam shibun ia kiba kum kine ki nongïalam kiba buh shuwa ia ka jingshakri paidbah bad trei na ka bynta ka bha ka miat jong baroh.
Ka JSM ka ai ruh ka jingsngewnguh sha ka Sorkar Meghalaya hapoh ka jingïalam jong u Chief Minister, u Shri Conrad K. Sangma, kaba la shim ia ki sienjam kiba shisha ban pynurlong ia kane ka jingdawa kaba donkam. Ka long ka jingkmen kaba khraw ba ka jingtei ia ka Government College ha East Jaintia Hills District ka la sdang lypa, kaba long ka dak histori ia ki paidbah jong ka thaiñ.
Katba ka ai jingïaroh ia kane ka jingkiew shaphrang, ka JSM ka kyrpad jur ia ka Sorkar ban pynsted ia ka jingtei bad ban pyndep kloi ia baroh ki jingdonkam khnang ba ka college kan sdang treikam kloi katba lah. Ka seng ka don ka jingkyrmen ba ha u snem ban wan, kane ka jaka pule kan treikam pura bad kan long ka tyllong jingkyrmen ha ka pule puthi ia ki samla.
Ka JSM ka pynskhem biang ia ka jingaiti jong ka ban ïai trei lang bad ka Sorkar bad kiwei pat ki bynta ba don bynta ban ïada ia ka jingmyntoi jong ki samla bad ban kyntiew ia ka roi ka par jong ka distrik.
Kane ka jingïoh jingïarap ka pyni ym tang ia ka jingtrei shitom jong ka JSM hynrei ruh ia ka jingangnud lang jong ki paidbah ka East Jaiñtia Hills ban ioh ia ka lawei kaba kham bha bad kaba ia ryngkat.
