Ka “Khooid Ya ka Wah Myntdu” (KYM) kawei na ki seng treimon sngewbha kaba peit ïa ka jingbha jingmiat jong ki sawdong sawkun ka Wah Myntdu, hadien ka jingwan ïakhun ïaka hok jong ka Wah Myntdu shaduh ka National Green Tribunal Principal Bench, New Delhi kaba la shong bishar haka 22 tarik u Nailar, 2025.
Na ka liang ki nongïalam ba hakhmat jong ka seng mynta ka sngi ha ka jingkren sha ki lad pathai khubor ha ophis treikam jong ka Chilliang Raij Jowai, u ma Khroo L Pariat u la ong kum ka kynhun ka pynpaw ïa ka jingsngewnguh kaba khraw eh ïa baroh halor ka jingnoh synñiang ki nongshong shnong naduh ki Dorbar Shnong, ka Seiñraij, ki kynhun treimon sngewbha bad ki riew shimet kumjuh.
Na kane ka jingnoh synñiang jong kiba bun ba lang ban ïada ïa ka hok ka Wah Myntdu, ka jingïoh lum baroh kumjuh na ka pisa bad na ka Gpay kala kynjoh sha ka T.2,45,244/- lak tyngka, na kane la don uwei u riew shimet khlem da kwah ban pynpaw kyrteng uba la noh synñiang marwei haduh Rs.1,00,000/- (Shi lak tyngka) na ka bynta ka Wah Myntdu, la pyntip ba ka seng kan dang bteng ïa kino kino kiba kwah ban noh synñiang.
Kum ka seng ka khlem da lah ban pynpaw ka jingsngewnguh kaba khraw eh lyngba kane ka pisa bala ïoh lum la lah ban pyndonkam na ka bynta ban siew sha ki Muktiar ki ban ïakhun haduh Supreme Court ïa ka hok ka Myntdu. Shuh shuh ula pyntip ïa ka jinglut jingsep baroh yn sa ai da ka Audit Report ïa kaba yn sa khot da ka jingïalang ha kine ki sngi ban wan.
