Ka Kiang Nangbah Govt College Students’ Union (KNGCSU) ka pynpaw ka jingsngewnguh bad ai khublei ïa ka sorkar kmie kaba la pyllait ïa ka jylla Meghalaya na ka jingpyntreikam ïa ka Common University Entrance Test (CUET) na ka bynta ki Undergraduate Level ha ka sien kaba lai naduh bala sdang ïa kane ka CUET.
Halor kane ka Students Union kala ai ka jingïaroh ïa ka sorkar jylla kumjuh kaba la ïaleh ban pynlait ïaka CUET-UG kata naduh u Myntri Rangbah ka jylla u Conrad K Sangma bad kumjuh ïa u myntri jong ka tnad pule puthi ka jylla u Rakam A. Sangma.
Ka jingshim rai jong ka jylla ban pynlait ïa kane ka Exam hapoh ka jylla kala long ka jingmyntoi kaba khraw eh ïa ki samla pule ka jylla kiba ïaleh ïa kane ka Exam hapdeng ki jingklumar jingmut ba bun. Kane ka jingshim rai jong ka sorkar jylla ka long shi bynta na ka rukom treikam kaba bha eh jong kane ka sorkar ba ïalam mynta, la ong ki nongïalam ka KNGCSU.
Na ka liang ka KGNGSU ka buh ka jingkyntu na u Myntri Rangbah ka jylla ba un ïaleh ban pynbha shuh shuh ïa ka tnad pule puthi na ka bynta ban pynkhreh janai bha ïaka CUET-UG ha ki snem ban wan.
Haka juh ka por ka Union ka ai ka jingïaroh ïa ka sorkar halor ka jingthmu ban pyntreikam ïa ka UGC na ka bynta ka State University kaba lah ban ïarap shibun ïa ki samla pule ka jylla.
La pynsngew ba dei tang ka NEHU kala lah ban pdiang ïa baroh ki samla ban leit pule ha ki kyrdan bapher bapher, la ong ka jingïoh ïa kane kan ïarap ïa ki jaka pule ban ïoh rung ha ki Government University bad kane ka pyni ba ka sorkar ba mynta ka long kaba la pyrkhat janai ïa ka jingbha jingmiat jong ki samla pule khamtam ïa kito ki wan na ka longïing kaba duk pynkut ka seng ki samla pule.