Ki lai ngut ki kytong jong ka Voice of the People Party (VPP) na ka thaiñ War Jaiñtia kiba kynthup ïa u Isaak Shylla na War-East, u Jamshaphrang Pohtam na War-Certral ïa bad u Batskhem Hayong na War-West kila pynpaw ka jingsngewskhem ban jop ïa kane ka Election hadien ba kila wan ban thep kyrteng ïalade mynta ka sngi 31 tarik ha ophis ka Amlarem Sub-Division WJHD.
Kitei ki kyrtong ka VPP kila pynpaw ïala ka jong ka nongrim ban ïakhun ïa kane ka Election MDC 2025 bad ki jingthrang jingangnud jong ki ban shakri ïa ki paid ka Constituency.
U Jamshaphrang Pohtam ula ong ka jingthmu hi ban ïaleh ïa kane ka Election ka long na ka bynta ban pynïaid shakhmat ïa ka thong jong ka party kata ban shakri ïa ka Ri bad ka Jaitbynriew. Ula ong um shem la poi pyrkhat ban rung sha ka kam saiñ hima sima, hynrei dei da ka jingmih ka VPP kala pynkylla ïa ki jingmut jingpyrkhat ban eh ïa ka kam sorkar ban leit shakri ïaka ri bad ka jaitbynriew.
Ula ong lada ka party kan wan ha ka jingjop nyngkong kum ki para dkhot kin don ka jingïatylli lyngba ka moto jong ka Party kaba ong ‘ban pynim pat, ban pynbha pat bad ban pynkylla dur’ ïa ka District Council bad ka jylla hi baroh kawei. U kyrmen ba ka party kan jop buh ha kane ka kynti.
U Batskhem Hayong na War-West u ong ka daw ba u mih ban ïakhun ïa kane ka Election ka long halor ka nongrim treikam jong ka VPP, kum u kyrtong lada un wan ha ka jingjop un ïaleh ban pynneh pynsah ïa ka khyndew ka shyiap.
Katba u Isaak Shylla na War-East ula ong ka jingwan jong u sha kane ka seng VPP ka long halor ka nongrim ka VPP kaba don jingkyrmen ïa ka lawei, ula ong kumba long mynta kat shaba leit ka lyer jong ka party VPP kala beh sha kylleng ki thiañ jong ka War Jaiñtia.
Sa ar ngut kiba wan ban thep kyrteng ha kane ka sngi ha Amlarem ki kynthup ïa u kyrtong ka INC u ma Romeo Lyngdoh na War Central bad u ma Blonsing Hayong kum u kyrtong shimet (IND) na War West.
