U ma Nehimaya Tyngkan u kyrtong jong ka Party Indian National Congress (INC) mynta ka sngi haba kren ha ka jingialang paidbah jong ki 13 shnong kaba la pynlong ha shnong Iooksi, ula pynpaw ia ka jingsngewskhem ba un poi beit sha ka thong ha kane ka kynti.
U ma Nehimaya ha ba kren sha ki hajar ki nongkyrshan jong u kiba la poi sha kane ka jingialang ula ong “Ym dei shuh ban ong lada ngan jop, hynrei ngan jop beit. Ka jingjop jong nga kan pynlong ia nga ban ioh iarap ia kiba bun ki kup shiliang ki sem shiliang lane kiba duk ba kyrduh, khamtam ia kito ki long ïing kiba don ia ki dkhot jong ka ïing kiba don jingduna ne kiba anna”.
Ula khot ia ki nongshong shnong jong ka thaiñ 13 shnong ba kim dei satia ban beh ia kiba her bad ieh ia kiba dem. U ong ba ma u hi, u dei u trai shnong jong kane ka thaiñ bad ka iap ka im jong u ka long beit sha kine hi ki thaiñ.
U Tyngkan u pynshai ruh sha ki paidbah da kaba ong ba ka Congress kam pat la duh jait hapoh ka Jylla Meghalaya, namar don katto katne kiba kren sharum shaneng ba ka Party Congress kam don shuh. Ula ong ba ki don tang katto katne kiba long ki khwan myntoi shimet bad ki bym skhem nongrim kiba la mih noh na ka seng Congress bad leit pyniasoh sha kiwei pat ki Party.
Na ka liang jong u ma Nehimaya ula khot bad kyntu jur iala ki nongkyrshan ba ki dei ban kiar na ka jingshah thong ha ki bor jong ka pisa. Ula ong ba bun na ki nongialam jong u kila shah thong pisa ban iehnoh ia u bad ia ka Party, hynrei kim shym la ngop ha kane ka jingshah pynbeit sbai.
Ha kajuh ka por ula ong ba ia u hi shimet ruh kila don kiba wan thong pisa haduh 5-7 klur tyngka, hynrei ula ong ba um hun tang ban ioh iatei ka pisa bad ban shong aram ialade da kaba klet pat ia ki paidbah nongshong shnong kane ka thaiñ kiba don hapdeng ka jingeh bad jingialeh ha kiba bun ki liang.