Ka Rangdajied United FC ka ba dei kawei na ki shlem ai jinghikai football ha ka Jylla mynta ka sngi ka 3 tarik Nailur ka la wan shakhmat ban soi soskular bad ka Club Bengaluru FC.
Ka jingsoi soskular mynta ka sngi hapdeng baroh artylli ki Club kata ka Rangdajied United FC bad ka Bengaluru FC ki la soi ia ka jingiateh kular kumba lai Snem hapdeng ka jingsakhi lang ki khynnah ialehkai ka Club Rangadajied ryngkat bad ki kmie ki kpa jong ki khynnah mynta ka sngi ha jaka ai jinghikai jong ka Club ha pynthorbah Shillong.
Ka jingsoi soskular ka long hapdeng u Eugeneson Lyngdoh na ka Rangdajied United FC bad u Dareen Caldeira uba wan mihkhmat na ka Bengaluru FC.
Haba ia kren sha ki lad pathai khubor mynta ka sngi na ka liang kine ki Club baroh artylli ki la pyntip ba ka jingiasoi soskular ka long kum shibynta ban ailad ia ki player ba tbit ba kin leit ban mihkhmat na ka Club Bengaluru FC ha ki jingialehkai bapher bapher kumba la mihkhmat da ki player kynsai ka Jylla kum u Eugeneson Lyngdoh bad u Aibor khongjee.
Shuh shuh ki la pyntip ba kin ai jinghikai ia ki Coach na ka Club Rangdajied sha Bengaluru ba kin ioh jingtbit shuh shuh ha ka kam Coach ban hikai ia ki khynnah ialehkai football jong ka Club.
Haka jingpynkut kine baroh artylli ki Club ki la pyntip bad ngeit skhem ba kane ka jingiasoi soskular kan don ka jingkyrmen ban ioh ia u soh jong ka jingjop na ka bynta kine ki Club baroh artylli.
