
Ka Mawlai bad Shillong Lajong FC ki la ioh ia ka jingjop don burom hynne ka sngi ha ka jingiakhun jong ka wat ba 10 na ka bynta ka lympung Shillong Premier League (SPL) 2024-25.
Ka Mawlai kaba dei ka lahduh jong ka samoi ba lah dep, ka la thaw rekod ruh mynta ka samoi na ka jingioh thep bun kol tam tang na kawei ka jingialehkai. Ia kitei ki 10 kol la ioh ban thep da u Khrawkupar Jana (27), Fullmoon Mukhim (33), Samlang Rympei (39), Arkibor Makhroh (43), Baiaikara Swer (48,89), Reformer Pale (66,78) Banskhem Mawlong (70), Overkindness L. Mawnai (90+1). Watla ka Ryntih FC la shah thep haduh 10 kol hynrei kane ka kynhun ka khlem leit phai ïing thylli bad ka la ioh ban thep shi kol lyngba u Basuklang Bina (56).
Haba phai sha kawei pat ka jingiakhun hapdeng ka Shillong Lajong FC bad Sawmer SC, la sakhi ba ka jingiakhun jong kine ki 2 kynhun ka long kaba kham noh shilliang ha kaba ka Lajong ka la thep haduh 6 kol katba ka Sawmer SC ka khlem lah ban pynphai haduh ban da kut ka minit ialehkai.
Na 10 sien ki jingiakhun mynta ka samoi, ka Lajong ka dang mad kawei ka nam rem bad kawei ka jingiakhaid. Lah ruh ban pynkynmaw ba katei ka nam rem kadei ha ka jingiakhun pyrshah ia ka klob Mawlai kaba dei ruh ka kynhun kaba khlaiñ tam mynta ka samoi.
Ha kane ka jingiakhun kaba mynta ka sngi ia kaba la pynlong ha madan SSA stadium Polo Shillong, ka Lajong ka la ioh ban sei madan lut ia ki snar ïalehkai kiba don bynta ha kane ka lympung SPL lait noh ia ki rangialehkai kiba dang ialehkai ha ka lympung I-League (first team). Ka Lajong ka la ioh ban pynkhih naduh ka kylla step, kata ha ka minit ba 10 lyngba u Yohaan Benjamin, hadien 15 minit u Riborlang Lyngkhoi u la thep sa shi kol na ka bynta ka Lajong. U Deibormame Tongper (27,61) bad u Babysunday Marngar (54,59) kiba dei ruh ki rangialehkai ki bym ju duh ban thep kol na ka bynta ka Lajong mynta ka aiom, ki ki la ioh mar 2 kol ha kane ka sngi.
Hadien kitei ki jingiakhun, ka Mawlai ka dang bteng ban bat ia ka kyrdan ba nyngkong, bad ka Lajong ruh ka dang skhem ha ka kyrdan ba ar.
Ka jingiakhun na ka bynta lashai ka sngi (25.01.2025), kan long hapdeng ka Langsning FC pyrshah ia ka Nangkiew Irat SC ha ka por 11:00 baje mynstep bad ka Rangdajied United FC pyrshah ia ka Ryntih FC ha ka por 2:30 PM.