Ka Shillong Lajong FC ka la ioh ban knieh biang ia ka kyrdan ba nyngkong na ka Mawlai SC hynne ka janmiet hadien ka jingjop pyrshah ia ka Nongrim Hills SC, kata da ka jinglah ban pynliem da 1-0 ha ka jingiakhun ba la pynlong da ka Shillong Sports Association (SSA) ha madan SSA stadium Polo Shillong.
Katei ka jingjop ka la wan hadien ka jingiakhun kaba la iakhaid bor naduh ka kylla step haduh kylla miet. Lah ban ong ba dei lyngba ka jingbeit kjat jong u Deibormame Tongper uba la ioh ban thep ha ka minit ba 89 ba ka Lajong ka la ioh ban khur 3 poiñ. U Deibormame u dei ruh uwei na ki rangialehkai uba la ioh ban thep bun kol tam na ka bynta ka Lajong mynta ka samoi.
Hadien katei ka jingiakhun kaba 7, ka Lajong ka la ioh 16 poiñ katba ka Nongrim Hills kaba dang neh ha ka kyrdan ba 3 ka la ioh 13 poiñ na 9 tylli ki jingïalehkai mynta ka samoi.
Ka jingiakhun na ka bynta lashai ka sngi, ka 7 Tarik Kyllalyngkot 2025 kan long hapdeng ka Nangkiew Irat SC pyrshah ia ka Rangdajied United FC ha ka por 2:15 janmiet.