Ka jingiaknieh ia ka nam Lahduh mynta ka samoi na ka bynta ka lympung Shillong Premier League (SPL) ka long kaba kham pher bad kham pynsmiej ia ki nongkyrshan jong ka Mawlai SC bad Shillong Lajong FC hadien ba ka Mawlai ka la mad ia ka jingiakhaid (2-2) kaba khlem khmih lynti hynne ka sngi ha ka jingiakhun pyrshah ïa ka Laitkor SC ha madan SSA stadium Polo Shillong.
Katkum ka jingkhmih lynti, ka Mawlai ka donkam sa tang 3 poiñ hynne ka sngi na ka bynta ban pyntikna ba kan ioh rah ia ka nam Lahduh kaba 3 sien lynter, kata hadien ba la la ioh ban rah ia ka nam Lahduh kaba nyngkong ha u snem 2022 bad kaba ar ha u 2023-24.
Kum ban shu pynkynmaw, ka Mawlai ka dei ruh ka kynhun kaba khlem pat mad ia ka nam rem ha kane ka aiom ialehkai jong une u snem 2024-25. Na 17 sien ki jingiakhun ha kane ka samoi, ka Mawlai bad Lajong ki la mad mar 3 sien ka jingiakhaid.
Ka Lajong bad Mawlai ki sah satang mar kawei ka jingialehkai bad lada baroh 2 kynhun ki khur ia ka jingjop, ka Mawlai kan rah ia ka nam lahduh hynrei lada jia ka Mawlai kam liem ha ka jingiakhun ba khatduh bad ka Lajong kan ioh ban khur 3 poiñ ha ka jingïalehkai ban pynkut ia kane ka aiom, ka Lajong kan rah ia ka nam Lahduh kaba 4 namar ka Lajong ka tam ha ka jingioh ban thep bun kol (goal difference).
Haba phai sha ka jingiakhun kaba mynta ka sngi, la sakhi ba ka jingiakhun ka long kaba la pynlyngngoh ia kiba bun namar ba ka Laitkor ka la lah ban pynkut ia ka samoi ialehkai da ka rukom kaba itynnad ha kaba ki la pynlong ruh ba ka Mawlai ka la duh duh noh ia ka kabu kaba ban bat biang ia ka nam Lahduh na ka jingbakla thep kol hi u rangialehkai ka Mawlai (own goal) ha ka minit ba 22. Ia kawei pat ka kol na ka bynta ka Laitkor la ioh ban thep da u Sandy Kharkongor ha ka minit ba 35, katba na ka bynta ka Mawlai la ioh ban thep da u Kevin Rymbai (27) bad u Banskhemlang Mawlong (58).
