Ka Mawlai SC kaba dei ruh ka lahduh jong kane ka lympung Shillong Premier League (SPL) ha ka samoi ba lah dep, ka la iai bteng ban khur ia ka jingjop ha kaba hynne ka sngi ruh ka la pynjem khnap ia ka Nangkiew Irat SC da 6-0 kol ha ka jingiakhun ba la pynlong ha madan SSA Stadium Polo Shillong.
Lyngba katei ka jingjop ka Mawlai ka la ioh biang ia ka kyrdan ba nyngkong kata da ka jingioh haduh 32 poiñ na 12 sien ki jingialehkai. Ka jingiakhun mynta ka samoi ban iaknieh ia ka nam Lahduh kan long hapdeng ka Mawlai, Shillong Lajong (29 poiñ) bad Rangdajied United FC (29).
Ha katei ka jingiakhun kaba mynta ka sngi, u Kevin Rymbai u la ioh ia ka hat-trick ba nyngkong jong u ha kane ka samoi, kata lyngba ka kol ha ka minit ba 47, 58 bad 90+3. U Overkindness L. Mawnai (42), Bynraplang Pyngrope (51) bad u Donald Diengdoh (90+1) ki la ioh mar shi kol.
Haba phai sha kawei pat ka jingiakhun, ka Sawmer SC ka la pynliem noh da 4-1 kol pyrshah ia ka Nongrim Hills SC. Ia kitei ki 4 kol na ka bynta ka Sawmer la ioh ban thep da u Bickyson Kharkongor (25), Aibandaplang Dohling (31), Shanmeiaki Warlarpih ha ka minit ba 42 bad shi kol na u Diego Khyriem (59) katba ia ka shi kol na ka bynta ka Nongrim Hills la ioh ban thep da u Alem Khongwir ha ka minit ba 87 lyngba ka penalty.
