Ka jingshna ïa u surok jong ka Public Works Department (Roads) Pasyih -Garampani (Saphai) uba don ka jingjrong kaba 26.982 km, hapoh ka skhim Meghalaya Integrated Transport Project ïa kaba la bei pisa da ka World Bank (Loan) ba la ïasoi bad ka sorkar kmie, kala pynsuk shisha haduh katta ïa ka leit ka wan jong ki paidbah nongshong shnong na katei ka thaiñ, watla ki dang don sa ki katto katne ki bynta ki ban shna pyndep kum ki jingker ia ki rud surok.
Kumba long mynta ïa une u surok Pasyih-Garampani la pyndep ban pyntrei ïa u hapoh 42 bnai naduh ba la sdang ïa ka kam ïa kaba la pyntrei da u ma Rocky Dhar kum u Contractor ka Dhar Construction Company (JV) ha ka jinglut kaba la kot sha ka 62,49,18,004.00 klur naduh ka kilomiter kaba 21 km haduh 47 km kaba la poi haduh ka shnong Saphai hajan khappud bad ka Assam kaba jrong 26.982 km.
Na ka liang ki paidbah ka thaiñ ki pynpaw ba ka jingïoh ïa utei u surok kan pynsuk shibun eh ïa ki paidbah nongshong shnong jong katei ka thaiñ kiba don ha shilynter u surok kiba kynthup ïa ka shnong Pyntei, Biar, Chatwakhu, Nongkroh, Lakadong, Them bad Saphai bad kiwei de ki shnong kiba don lyngba utei u surok.
La sakhi ba une u surok u long uba jlih bha bad la shna ruh ïa ki katto katne tylli ki bynta ban pynïeng bad ap kali (Bus shed) ban pynsuk ïa ki paidbah, ki Traffic Signs bad kiwei. Ka jingbha jong une u surok kala kham pynduna shuh shuh ïa ka por ban poi sha kitei ki shnong ym kumba long ha ki por mynshwa kaba la shim por da ki bun bun kynta tang na ka jingsniew palat ka surok.
