Ka jingsuki palat liam ban pyntrei ïa ka surok Maweit naduh Mawdom sharum kaba don tang 12 kilometer, ka la pynsyrtok ïa ka leit ka wan ki nongshong ka thaiñ Maweit, kumba long haduh mynta ka um ktieh ka dap shilynter naduh Mawdom haduh Rangsohlait Umïong, namar ka jingsiang maw ruh ka dang dep tang haduh katei ka jaka.
Ym lah len ba ka jingtrei ka la ïaid shakhmat, hynrei ka jingsuki ka long kaba palat liam, ha kaba ki paidbah ki la kynthoh ruh ba imat u contractor u duna ki kor ki bor kum ki JCB bad kiwei kiwei, ban pynkloi ban pyndep wut wut ïa ka jingsiang rong.
Na ka liang uwei na ki paidbah nongleit nongwan u la pynpaw ïa ka jingsohsat bad ka jingsyllang ka ïaid ka ïeng wat ka bike ruh hateng hateng ka la khyllem bad hap khyllie barabor.
U Samla Jeremaïa Dkhar ha ka jingïakren bad ki nongthoh khubor, u la ong ba kane ka jingsniew palat liam kane ka surok, ka la pynjynjar sat ïa ki nongleit nongwan ka thaiñ Maweit khamtam ki tymmen ki kro bad kiba pang kiba shitom.
Ha ka jaka ban poi tang 30 minnit na Nongstoiñ shaduh Maweit, hynrei ka jingsniew palat liam kane ka surok na Mawdom shaduh Maweit ki kali bad wat ka bike hap ban ïaid haduh 1 kynta shiteng.
Kiba niah bike lada ki shong ar ngut ki la hap ban hiar bun ki jaka, namar wat tang marwei ruh bun ba la hap ban hiar shwa na ka bike bad hap ban ïaid jan 1 kynta tam tang na Phoksohlait haduh Mawdom, kaba khlem siang maw mynta sa tang 8 lane 9 kilometer.
Ki nongniah kali rit kum ka sumo, ki camper bad wat ki nongniah bos ki la pynpaw ïa ka jingsyllang namar ka jingsniew palat liam kane ka surok, khamtam ha kane ka aiom slap namar ka jingshong um ktieh.
Ki paidbah nongleit nongwan ka thaiñ Maweit kiba bun ki la pynpaw ba ki la tieng ban shong ha ka bos namar i kumba la jan khyllem ha bun ki jaka.
Kumta, na ka liang ki paidbah nongleit nongwan ka thaiñ Maweit ki la kyrpad ïa u contractor ban pynkloi noh ban pyndep khamtam ban ïoh siang maw noh ïa kane surok shilynter.
