Ka lympung ïalehkai phutbol jong ka kyrdan ‘Super Division Football Tournament – 2024’ ïa kaba la tip kum ka “U Kiang Nangbah Memorial Trophy” bala pynïaid da ka West Jaiñtia District Sports Association, (WJDSA) Jowai kaba la long mynta ka sngi Saitjaiñ 8 tarik u Naiwieng ha madan Kiang Nangbah Stadium, Dongmihsngi Jowai.
Ha ka jingïakhun kaba nyngkong ka kynhun ïalehkai jong ka 7 Wasa United kala pynliem da 4-0 kol ïa ka Sailung Ialong, ïa kitei ki kol na ka 7 Wasa United la thep da u Niewkor Sana haka minit ba 60, u Teiborlang Malang haka minit ba 72 bad u Jeff K Rymbai haka minit ba 84 & 90.
Katba ha ka jingïakhun kaba ar ka Ladthadlaboh kala pynliem da 2-0 kol ïa ka Mukhla Raij, ïa ki kol na ka Ladthadlaboh la thep da u Promise Suting haka minit ba 39 bad u Dowell John Shylla haka minit ba 79.
La pyntip ka jingïakhun haka 11 tarik u Naiwieng, 2024 ka long hapdeng ka Shangpung Lumiawmushai pyrshah ïa ka Wahiajer haka por 11 baje mynstep.