“Ngim don hangne tang ban put Turoi”
Ha ka sngi ba ar jong ka Dorbar Mang Tyngka, u Bah Ardent Miller Basaiawmoit u ba dei ruh u Nongïalam jong ka seng VPP bad uba don ha ka liang pyrshah, hynne ka sngi ka 3 tarik Lber 2025 u la pynpaw ia ka jingdiaw bad ka jingsyier ba leh lut phut ka Sorkar MDA da kaba bteng ban shim ram. U la khyrwit ruh ia ka sorkar kaba la buh thong ban pynpoi ia ka ioh ka kot kaba 10 million dollar ha shwa u snem 2028.
Ha kaba iadei bad ka jingpynpaw ka Sorkar Jylla ban kyntiew ia ka Jylla ha ka ioh ka kot, u Bah Ardent u la sdang da kaba ong “Kam long kaba sniew ban don ia ki jingangnud ban kynjoh 10 million dollar ha ka ioh ka kot ka jylla. Hooid ngan dei nyngkong ma nga u briew u ban kmen lada iohi ia ka jingkiew bad ka jingkylla ha ka ioh ka kot. Katkum ka thong jong ka Sorkar MDA ka long ban wanrah ia kata ka jingkylla kaba 10 million hynrei ngi kwah iohi ia ka jingshisha lane ki jingleh. Ngim don hangne tang ban put turoi lane ban pynsngap jingrwai ia ka sorkar hynrei ban iohi ia kata ka kam kaba paw ha ka jylla baroh kawei”.
U Bah Ardent u la ther ruh ia ka Sorkar kaba leh matlah ia ka jingkyrduh kam ha ka jylla “Ka jingkiew ha ka jingkyrduh kam ha ka jylla ka la kot haduh 6.0%. ngam tip naei ka pisa kan wan, hato ngi lah ban shim ram (loan) biang na ki bank bapher bapher. Kane ka jingbteng ban shim ram ka lah ban ïalam ia ka Jylla sha ka thliew lane ka jingriam jong ka jingsahram.
U Bah Ardent u la buh jingkylli ruh ia ka Sorkar ba haduh katno la dep ban shim ram bad katno yn lah ban siew. Kiei kita ki jait ram ba la ioh bad pynbiang. U Bah Ardent u la pynkynmaw ruh ia ki para dkhot Assembly ba ka jylla Meghalaya ka dei ka jylla bym don tyllong ne jingmih da lade. “U Myntri Rangbah u la pynthika da lade ba ka Sorkar Jylla ka shniah lut na ka tyllong jong ka Sorkar pdeng”.
U Bah Basaiawmoit u la kam ba kane ka thong jong ka Sorkar MDA kan wanrah ia ka jingeh, jinglehraiñ bad ka kan poi ruh haduh u pud ban khlong ia u Uranium uba don ha Domiasiat-Mawthabah, South West Khasi Hills District na ka bynta ban long kum ka jingbuh banda sha ka Sorkar pdeng.