Mynta ka sngi u MDC ka Mynsngat-Khanduli ma Dawan Lyngdoh lem bad ki ar ngut ki paralok kiba kynthup ïa ka kong I. Swer bad u ma P. Shadap mynta ka sngi Balang kila leit ban synñiang jingïarap da ki jaiñ blanket sha ki 14 ngut ki khynnah khunswet kynthei kiba don ha World Mission Children’s Home (Girls) Moodop, Nartiang kaba hap hapoh ka Thadlaskeiñ Block West Jaiñtia Hills District.
Ïa ka jingïalang ha kane ka sngi hashwa ban sam ïa kitei ki nep syiad la pynïaid da u Rev. H.L Pale la ïoh ruh ka jingkren na u ma Pyndap Shadap bad na u MDC ma Dawan Lyngdoh kiba la pynsngew katkum ka jingkot ka bor jong ki kila synñiang da kitei ki nep syiad, kila kyntu ïa kitei ki khynnah ba kim dei ban sngew khunswet, hynrei ki dei ban don ka jingminot ha ka jingim khnang ba ka lawei jong ki kan long kaba phyrnai.
Kila ai mynsiem da kaba ong ba ki don kiwei pat ki khynnah kiba im sha ki thaiñ nongkyndong kiba don hapdeng ka jingduh bad jingkyrduk, hynrei kane ka jaka Children’s Home ka long kum ka lad ban pyndap ïa ki jingdonkam jong ki, kila kyntu ïa kitei ki khynnah ba kin long kiba don akor kiba kohnguh bad kiba sngewburom ïa ki nongpeit nongsumar.
Kum ka dak jong ka jingburom kylliang ïa kitei ki jingai sngewbha kitei ki khynnah khunswet kila pynpaw ïa ki sap ki phong jong ki da kaba kila ai da ka jingshad kaba itynnad, katba ïa ki kyntien ai khublei la ïoh na ka Superintendent katei jaka ri khunswet ka kong S. Pala.
