Ka Rotary Club Jowai kawei na ki kynhun treimon sngewbha hapoh ka nongbah Jowai kala synniang pisa na ka bynta ban shna noh ia ka jaka leit shabar paidbah ha ka madan ialehkai Kiang Nangbah Stadium Jowai, Ladthalaboh Jowai.
Ia u maw nongrim ban tei ia kane ka jaka leit bar la wan ban plie da u MLA ka 2-Jowai Constituency ma Wailadmiki Shylla ha kane ka sngi saitjaiñ, ha ka jingdonlang ki dkhot ka Rorary Club Jowai bad ki nongkitkam ka West Jaiñtia District Sports Association (WJDSA).
U ma S.K Lato kum uwei na ki Founder member jong ka WJDSA uba dei ruh u ex-President ka Rotary Club Jowai ula pynpaw ba ka long kaba donkam shisha ban don ia ka jaka leitbar na ka bynta ki paidbah hapoh kane ka stadium Kiang Nangbah namar kiba bun ki nongwan peitkai (paidbah) kila hap ban leit bar sha rud sha kiar jong ka madan.
Ia kane ka jaka leit bar yn iarap pisa lang na u MLA ma Wailadmiki Shylla lyngba ka 15th Finance kaba kot haduh T.10 lak tyngka.
U ma Wailad haba ai jingkren ula ai khublei kyrpang ia ki dkhot ka Rotary Club Jowai kiba la iohi jngai ia ka jingdonkam jong ki paidbah.
Ha ka juh ka por u ai khublei kyrpang ia ka jingdap 50 snem ka West Jaiñtia District Sports Association bad mynta u snem kin don shibun ki prokram ialehkai kiba long shi bynta ban kyntiew ia ka sap ka phong ialehkai jong ki samla.
Ia ka jingialang la pyniaid da u President ka Rotary Club Jowai Rtn. Montre Passah, la ïoh ruh ka jingkren na u Working President ka WJDSA ma EMH Passah bad ki kyntien ai khublei na u Football Secretary ka WJDSA ma Nangebor Suting.