Kum shibynta ban synnniang jingiarap ia kawei ka jaka ri khunswet kaba don ha Tuber Kmai Shnong ka 7-Thyndai Child Care Institution Cum Counselling Center, mynta ka step ka kynhun ki nongniah Bike kaba la tip kum ka Tuber Bikers & Tour Association (TB&TA), Tuber Kmai Shnong, East Jaintia Hills District, ryngkat ka jingiatrei lang bad ka ophis u Superintendent of Police, Khliehriat, kila pynlong ia ka Adventure Tour, kaba sdang naduh na Shnong Tuber Kmai Shnong shaduh sha shnong Sohrah East Khasi Hills District. Ia kane ka Tour la pynlong halor ka phang ‘Helping to an Orphanage”.
Mynta ka step u President ka TB&TA u ma Bida Kyndiat, haba kren bad ki nongthoh khubor u la ong ba ia kane ka Association la seng ia ka dang ha kine ki khyndiat snem, kum kane ka Tour ka Association ka la ju pynlong ruh ha kine ki snem ba la dep halor ka juh ka phang bad kane ka long ka sien kaba saw kum kane ka program jong ka Association bad kadei ka sien ba nyngkong ba seng ka ioh ban iarap ia katei ka jaka ri khunswet kaba don ha Tuber Kmai shnong.
Ha ka jingiadei bad ka rukom niah ia ki bike u la ong na ka liang ka seng ka ju ai jinghikai kumno ban niah kum ha kane ka por ba iaid lang shi kynhun bad kumno ban lait ia ki jingjia bapher bapher, da kaba bud ryntih ia ki kyndon ain kum ha kaba pyndonkam ia ka Helmet bad kiwei de ki jingiada na ka bynta ki nongniah bad ia kiwei kiba don ha ka lynti.
