Ka Sarot I Man, kawei na ki group ba don hapoh ka Shnong Panaliar, Jowai, mynta ka sngi (2.4.2022) kala ioh ban leit synñiang snam biang ha Jowai Blood Bank kaba iahap ha u juh u bnai ba kala leh ia kane ka kam ha u snem ba la dep 2021.
Ha shwa ban pynlong ia kane ka jingsynñiang snam ka la don ka jingialang kaba lyngkot kaba la pyniaid da u ma Jait Dao Sumer. La ioh ka jingkren na ka Dr. Patricia Shylla, ba dei peit ia kane ka jaka pyllang snam bad ruh na u ma Aziz War uba dei u dkhot jong kane ka group.
Ka Dr. Shylla kala ong ba watla ka Sarot I Man ka long ka kynhun kaba rit kaba don tang katt katne ngut ki dkhot hynrei pat ka la lah ban leh ia ki kam kiba khraw. Kala pynpaw ruh ka jingsngewnguh ia ki dkhot jong ka seng kiba la kloi ban ai ne synñiang ia ka snam jong ki sha kane ka jaka pyllang snam ka sorkar. Kala ong ba ka jingaisnam ka long ruh shi bynta ban pynkhuid ia ka met ka phad jong u nongai snam. Kala kyntu ruh ia kiwei de ki kynhun ne riew shimet ban bud ia ki nuksa jong kane ka kynhun ban long ki nongpyllait im ia shibun ki briew kiba donkam ia ka snam ha ka shitom shipa jong ki. Kala ai jingbatai ruh halong ka jingpang AIDS bad HIC.
Na ka liang ka Sarot I Man la ioh ban kren da u ma Aziz War uba la kren halor ka jingdonkam jong ka snam ha ka jingim jong kiba don jingim baroh. Ula ong ba watla ka jingstad jong ka Science bad Technology kala kiew hynrei haduh mynta ym don ba lah ban shna ia ka snam kumba shna ia ki dawai ba bun jait ki ban pynkoit ia ka jingpang bad kiba lah ban ioh na ki jaka die dawai (Pharmacy). Kumta u kyntu ia kiwei de ban long kiba kylluid mynsiem ba synñiang ia la ka jong ka snam khnang ba yn lah ban ai ka jingim ia kiba donkam ia ka.
Na ka liang u Chairman jong ka seng ula ai ka jingkren lyngkot ha kaba ula pynkynmaw ruh ba ha u snem ba la lah (2021) ka kynhun ka la ioh ban synñiang snam sha kane ka juh ka jaka pyllang snam ha ka 17.04.2021. U kitbor kitrwiang ia baroh ki dkot ba kin ioh ia ka met ka phad kaba koit ba khiah.
Na ka liang jong u ma Jait Dao Sumer ula pynpaw ruh ka jingsngewnguh kyrpang ia baroh kiba la noh synñiang ia ka snam jong ki ha kane ka ngi kiba kynthup ia u ma Oliver Shadap Passah, u Anthony Challam, u Wombai Sumer, u Kyllimot Lhuid, u Ram Sumer. U ma Sumer ruh ula synñiang lem ia ka snam jong u ha kane ka sngi.
