Ka Sarot I Man ka kynhun jong ki 11ngut shi paralok, kaba la buh ia ka thong ban ai snam sngewbha manla ka snem sha ka Jowai Civil Hospital Blood Centre kaba don ha pyrshah ka Panaliar Secondary School, Panaliar Jowai, mynta ka sngi ruh ka 5th April, 2025 ka la pynlong ia ka jingsynniang snam (Blood Donation Camp).
Ha shwa jong kne la don ka jingialang ba lyngkot ba la pyniaid da u ma Riquoma Rq. Laloo, dkhot bad laioh ruh ia ki kyntien na kiwei pat ki dkhot, ki kyntien nguh Blei na u Sienmitre Sumer, kyntien shaphang katei ka sngi na u Shape Pasweth bad ki kyntien ai khublei na u Jait da o Sumer.
Ka Dr. I. Khyriem, Senior Medical Officer kaba peit ia katei ka Blood Centre, ka la ai ka jingkren lyngkot bad iaroh shikatdei eh ia ka Sarot I Man, kawei na ki group kaba don shisha ka jingkitkhlieh ban iarap ia kiba donkam, kum ha kine ki bynta. Ka la ong ba ka Voluntary Blood Donation ka ai jingiarap ym tang ia ki mynsiem ba donkam, hynrei ka iarap ruh ia ka Blood Centre ba kan ioh ban buh ia ka snam bad ban ai sha kiba donkam ha kano kano kapor. Ka la aibor ai mynsiem bad khot ruh ia kiwei ban wan shakhmat ban synniang (donate) ia ka snam jong ki, namar ka jingai snam ka pynkoit pynkhiah ia ka met u ba ai ha ki ba bun ki liang. Ka ai jingmut ruh ia ka Sarot I Man ban pynsngewthuh ia kiwei da kaba pynlong ki kynja awareness prokram shaphang kane.
Ha ka jingkren jong u Shape Pasweth, u la iathuh ba ka Sarot I Man, mynta la saw sien ka ladep ban ai snam ha kane ka Blood Centre. Ka group kaba don ka jingthmu ban iarap ia ki mynsiem ba donkam jingiarap, ka la pynlong ia kine ki prokram ha ka rata ka jong ka ruh kaba dang saw snem hi. U la ong ba, naduh ba sdang ia ka group, ki shait leit ai jingiarap sha ki shnong bapher bapher da ki sopti ne ki marbam, hynrei ynda ki la puson bha, ki lap ba kane ka Blood donation kadei kawei na ki mat treikam jong ka ban buh ha khmat duh. U bah Shape u la ai khublei kyrpang ia ki Donors kiba don shisha ka mynsiem ban wan shakhmat ban donate ia ka snam jong ki, ymtang ha kane ka por, naduh kipor ba mynshwa ruh.
Kiba la iashimbynta ban ai snam mynta ka sngi ki long, u Kyllimot Lhuid, u Ram Sumer, u Mariabud Paswet bad u Sienmitre Sumer ki badei ki dkhot ka Sarot I Man. Nalor kita, lawan ban ai sngewbha da u Firsterborn Dkhar, uba dei u Lecturer ka Jaiñtia Eastern College, Khliehriat; u samla Arsa Shylla na Panaliar Jowai bad u Heibor u Tre Syngkon, Waheh Shnong ka Dorbar Shnong Tpep Pale, Jowai.
Ha shwa ban pynkut, u ma Riquoma u la iathuh lyngkot ia ka jingiaid lynti ka Sarot I Man, kaba dei ka kynhun (group) kaba, ki dkhot ki don ka juh ka jingthmu ba kylluid mynsien ban iarap ia kiba donkam. U la khot ia ka jingiatreilang kiwei ruh na ka bynta ka jingbha ha ki liang baroh.