Ka Society for Urban & Rural Empowerment (SURE) ha ryngkat ka jingïatrei lang bad ka Jowai Civil Hospital Blood Centre mynta ka sngi saitjaiñ kala pynlong ïa ka prokram ai jinghikai ha kaba ïadei bad ka jingpang HIV/AIDS Cum Voluntary Blood Donation Camp kaba la pynlong ha CHC Ummulong, West Jaiñtia Hills District.
Ïa kane ka prokram la ïarap pisa da ka Meghalaya Aids Control Sociaty (MACS), ha kaba ïa ka jingïalang la pynïaid da ka kong Coriniki Slong, la ïoh ruh ka jingbatai ha kaba ïadei bad ka Link Worker Scheme (LWS) da ka kong Darimika Lywait bad ka jingbatai bniah shaphang ka jingpang HIV/AIDS da ka kong Sunita Sunn.
Katba na ka liang Dr. P. Shylla, Medical & Health Officer In charge Blood Bank, Jowai Civil Hospital, ha ka jingkren kala ai ka jingïaroh ïa ka SURE kaba la lah ban pynlong ïa kum kane ka prokram ai jinghikai bad kumjuh ïa ka jingsynñiang snam.
Ka la pynshai ruh ba ka jaka buh snam (Blood Bank) kaba don ha Jowai ka la ïaid lynti mynta la 6 snem bad kala ai ka jingshakri kaba khraw eh ïa ka Ri Jaiñtia hi baroh kawei kynthup ïa ka East bad West Jaiñtia Hills, shuh shuh kane ka Blood Bank kala ai ka jingkyrshan ïa ki lai tylli ki Hospital hapoh ka sor Jowai kumjuh ïa ka Blood Storage kaba don ha East Jaiñtia.
Ka jingïaid shaphrang jong kane ka Blood Bank ha Jowai ka dei lyngba ka jingkyrshah ba radbah jong ki nongsynñiang snam kiba la wan ai ïa ka snam na ka por sha ka por, kumta ka la pynsngew ba ka dang donkam bha ban don ïa ka stock kaba biang lada wan kano kano ka jingdawa khnang ba yn lah ban pyndap ïa ka snam.
Ha ka juh ka por ka kyntu ïa ki paidbah nongshong shnong ba kin wan shakhmat ban synñiang ïa ka snam, da kaba pynshai ba kiba lah ban ai snam ki dei ban kynjoh ia ka rta kaba 18-60 snem shaneng (kynthei ne shynrang), ka jingkhia ka dei ban palat ïa ka 45 kilo bad hadien ba ynda la dep ban shim ïa ka snam yn leh sa ka test kiba don haduh san (5) jait ki rukom test. Na ka liang ka kynhun ka Society for Urban & Rural Empowerment (SURE) kila don haduh 7 ngut ki shynrang kiba la synñiang snam ha kane ka sngi hapoh katei ka CHC ha Ummulong.
