Mynta ka sngi u Myntri jong ka Social Welfare Department, Revenue and Disaster Management Department, etc, u ma Kyrmen Shylla ryngkat bad u Deputy Commissioner ka East Jaintia Hills District, Khliehriat, u A. Baranwal, IAS kila ïoh ban sam ïa ka song jingïarap sha ki lanot bala shah lynshop ha ki bor jong ka mariang kiba don hapoh kane ka District.
Ïa kane ka prokram la pynbit pynbiang da ka ophis jong u Deputy Commissioner East Jaintia Hills District, Khliehriat bad la pynlong ïa ka jingïalang ha Conference room jong ka ophis u Deputy Commissioner’s Office, Khliehriat.
Haba kren ha ka jingïalang u ma Kyrmen ula ong ba ka jingpynïoh ïa kane ka lad jingïarap sha ki longïing ba ïa kynduh ïa kane ka apot la pynshong nongrim katkum ka jingshah pynjulor jong kato ka ïing ne jaka bad kat kum ki kyndon jong ka National Disaster Response Fund (NDRF) bad ka State Disaster Response Fund (SDRF).
U Myntri ula ïaroh ruh ïa u DC bad ïa ki nongtrei jong ka District Disaster Management Authority kiba la trei shitom bad trei stet ïa ka kam ban lum jingkheiñ ïa baroh ki jingjulor hapoh ka District na ka bynta ban pynïoh jingïarap ïa ki.
Kane ka jingïarap ka khynthup ïa kito ki jingpynjulor kum ka jingpluh ding, jingshlei um, ka jingtwa khyndew bad kiwei de.
U Myntri ula kyntu ruh ïa kiwei pat ki District hapoh ka jylla ba kin bud ïa kane ka nuksa ban pynkloi ka jinglum jingkheiñ bad ban pynpoi ïa ki lad jingïarap ïa kito ki longïing ba shah lynshop. Ula kyntu ruh ïa ki paidbah ba kin ai jingtip mar mar sha ki bor pynïaid District, ki BDO, ki Gram Sevak bad wat sha ki Rangbah Shnong lada jia kano kano ka jingshah lynshop ha ki bor mariang.
Kham hashwa la ïoh ka jingkren na u DC, A. Barnwal, IAS uba la ïathuh ba na ka liang ki bor District kila ïaleh shitom ban pynthikna ba ka jingïarap kan poi kloi sha kito kiba ngat ha kane ka jingeh. Ula ïathuh ba ka pisa kaba la pyllait ha kane ka sngi ka kot T.17,48,924/- (Khadhynñiew Lak Sawphew phra Hajar, Khyndaispah ar phew Saw) tyngka ka ban sam sha ki 58 ngut ki longïing.
Ha kane prokram la ïadonlang ruh u bah SS S.S. Syiemlieh, MCS, Addl. Deputy Commissioner, East Jaintia Hills District, Khliehriat, Shri. J. Shylla, MCS, Addl. Deputy Commissioner, East Jaintia Hills District, Khliehriat bad u Dr. T. Shylla, Block Development Officer, Wapung C&RD Block nalor kiwei de.