Mynta ka sngi u Myntri Rangbah ka jylla u Conrad K. Sangma ula ioh ban iashim bynta ia ka jingialang SHG Mela kaba la pynlong ha Byrnihat ha kaba ula ioh ruh ban sam ia ki skhim jingiarap sha ki 725 tylli ki kynhun nongrep jong kane ka thaiñ.
Ha kine ki 725 tylli ki kynhun nongrep ki kynthup kumba 5183 ngut ki nongrep kiba la ioh ia kane ka jingiarap kala la kot T.2.59 klur tyngka kaba la ai lyngba ka prokram ba kyrpang jong ka sorka jylla ia kaba la tip kum ka FOCUS kaba dei ka skhim iarap ia ki nongrep hapoh ka jylla.
Na ka liang jong u Myntri Rangbah u pynpaw ka jingkyrmen ba lyngba kane ka jingiarap pisa ka sorkar jylla sha ki nongrep jong kane ka thaiñ kan wanrah ia ka roi ka por bad ka ioh ka kot kaba biang ia baroh ki nongrep. Ula kyntu ruh ia ki nongrep ban pyndonkam hok ia kano kano ka jingiarap kaba la pynioh ne ai da ka sorkar. U buh ruh ka jingkyntu ia ki nongrep ban thaw da ki kynhun ha ki shnong ki thaw jong ki, ha ka dur jong ki Self Help Group, ne ki Society khnang ba ka sorkar kan lah ban pynioh jingiarap ia ki.
