Mynta ka sngi u Myntri Rangbah ka Jylla u Conrad K. Sangma ula iohlad ban leit hiar sha ka shnong Latyrke, East Jaintia Hills District, na ka bynta ban leit sam ia ka song jingiarap ia ki kynhun nongrep jong katei ka thaiñ ha ka jingialang jong ka SHG Mela.
Ha kane ka sngi u Conrad ula ioh ban pyllait ia ka song jingiarap kaba T,24,95,000/- (Arphew saw lak khyndaiphew san hajar) tyngka sha ki 46 tylli ki kynhun Nongrep (Producer Groups) ha ka jingiadon ryngkat u ma Kyrmen Shylla Myntri ka Social Welfare bad u ma Hopefull Bamon Ex-MLA, bad ki sahep Sorkar ka East Jaintia Hills District.
Haba ai jingkren ha kane ka sngi u Conrad ula ong ba ka Sorkar hapoh ka jingialam jong u ka sngewkmen ban ai ka jingkyrshan sha baroh ki nongrep jong ka Jylla na ka bynta ban kyntiew ia ka ioh ka kot jong ki. Ula pynkynmaw ruh ba kane ka prokram (FOCUS) ka dei kaba la mang kyrpang na ka bynta ki Nongrep bapher bapher hapoh ka Jylla na ka bynta ban pynioh ki lad jingiarap ia ki. Ula kyntu ruh ia ki Nongrep ba ki dei ban thaw ia ki kynhun kum ki SHG, ki Villange Integrated Cooperative Society khnang ba ka sorkar kan ioh ban pynioh ia ka bhah sha ki nongrep kiba dei hok ban ioh ia ka.
