Hadien shibnai 6 sngi ba ka Voice of the people’s party (VPP) ka la ioh ia ka jingjop kput ha kane ka Elekshon MDC 2025, 2 tylli ki aiñ la dep ban pynthymmai hapoh ka jingialam jong u Bah Shemborlang Rynjah kum u CEM. Kitei ki aiñ ki kynthup ia ka jinglum khajna hapoh u pud u sam jong ka KHADC bad ka jingai lisen (trading licence) sha ki bar jylla.
Ia kane ka mat halor ka jingai lisen, la rai hadien ba ka Seng Hynñiewtrep Youth Development Council (HYDC) ka la leit ban iakynduh markhmat ia u CEM bad buh ruh da ka Dorkhas halor ka jingkyrduh kam ki samla na ka jingbun ki bar jylla kiba trei ia ki kam bapher kiba kynthup ia ki kam ba ki Khasi ki tbit bha.
Ha katei ka jingleit buh Dorkhas la ialam ia ka kynhun da u Bah W.Sohtun President ka HYDC. Hadien ba la mih na ka kamra u CEM, u Bah Sohtun u la pynpaw ia ka jingkmen ba u CEM u la rai ban pynduh noh ia ka jingai lisen sha ki bar jylla. U la ïaroh ruh ia u Bah Shemborlang watla u dei u CEM ba thymmai ha kane ka kam hynrei u long uba shimkhia bad shimrai lang ia kane ryngkat bad ka EC ba thymmai.
U Bah Sohtun u la ong ba ia kane ka mat dei ban shimkhia bad dei ruh ban pyntreikam da ka aiñ ba thymmai ia kiba la ioh lisen lypa ha ka por ba donkam pynthymmai lisen “Ym dei eh tang ban ym ai trading lisen shuh sha ki non tribal hynrei dei ruh ban pyrkhat ba ia kine kiba la ioh ia ka NOC, ka District Council ka dei ban buh da ka kyndon ba ha ka por ba pynthymmai ia ki lisen jong ki, dei ban buh 70 na ka 100 ki nongtrei da ki trai Ri trai muluk ha kino kino ki jaka” ong u President ka HYDC.
U Bah Sohtun u la ong ruh ba u la ban jur ba u CEM dei ban pyntreikam ia ka bai bylla sngi (minimum wage) ba la buh da ka Sorkar Jylla lyngba ka tnad Labour, kata ban ym duna ia ka 525 tyngka shi sngi. U la kdew ba kane ka mat dei ban pyntreikam ha baroh ki jaka kiba hap hapoh u pud u sam jong ka KHADC.
Da ka jingsngewkhia ia ka ioh ka kot bad ka roi ka par, u Bah Sohtun u la ong ba ha kum kine ki bynta, dei ban klet ia ka politik bad ban ym kheiñ mano mano ba shna aiñ bad mano ba pyniaid namar kane ka mat kadei kaba ktah ia ka jaitbynriew.
Nalor kata, u la ban jur ruh halor ka jinglap jong ka seng ia kiba trei ha Petrol Pump ba katkum ka jingleit wad jingtip jong ki, la iathuh ba 90 na ka 100 ki nongtrei ki dei ki bym dei Khasi, katba ka kyrteng jong kitei ki pump ki dei kiba la long trai da ki Khasi hi. Shuh shuh u la iathuh ba tang 2 tylli ki Pump ba ki la lap ba 100% ki dei ki nongtrei Khasi bad ka jingsiew ia ki ruh ka kham heh ban ia ka dor ba la buh da ka Sorkar Jylla.
Halor ka jingkylli ba naei ka daw ba ki petrol Pump kim buh da ki nongtrei Khasi, u Bah Sohtun u la iathuh ba bun ki pump ki aidaw ba ki Khasi kim nang ban trei katkum ka jingdonkam jong ki hynrei ha kaba iadei bad kane u la ong “ki samla Khasi jong ngi kiba pass nurse, u Japan ruh u dang pan, ki samla ba pass hotel management, u Taj Hotel na Mumbai ruh u dang khot trei, nga tharai ka don ei ei ha lyndet jong kane” ong u Bah Sohtun.