Ka Dorbar shnong Sohmynting, West Jaiñtia Hill District lyngba Committee shnong haka jingialang bala pynlong haka 11 tarik mynta u bnai kala shim ia ka rai ban pyntip paidbah ba ia kano kano ka jingialang elekshon la khang ban pynlong ha ki dong ki shnat ne kino kino ki jaka, hynrei dei ban pynlong beit tang hapoh ka Dorbar Hall jong ka shnong.
Naka liang ka dorbar shnong ka pdiang sngewbha ia baroh ki candidate ka 2-Jowai Constituency kiba kwah ban pynlong ia ki jingialang paidbah jong ki, hynrei ki dei ban da pan jingbit na ka dorbar shnong ban pynlong jingialang bad kata ruh ban pynlong tang ha Dorbar Hall jong ka shnong la ha kano kano ka por ruh.
Ka shnong ka la shim ia kane ka rai ka long hadien ka jingpyrkhat sani bha ia ka bha ka miat jong ka shnong ka thaw ha kiba bun ki liang, kumjuh ruh ha ka liang ka khuid ka suba.
Kumta ka Dorbar Shnong ka kyrpad ruh ia ki nongialap election ban burom ia ka rai jong ka shnong da kaba iatreilang naka bynta ka bha ka miat baroh lang.