Ka long ka kam ka ban ioh ia ka jingiaroh bad ka jingaimynsiem ha kaba ka Shillong Municipal Board (SMB) ka la lah ban pynkylla dur ia ka jaka theh ñiut ha 9Lad Shillong kaba dei ruh kawei na ki jaka ba ijli namar ka jingkynton ia u ñiut naduh mynstep haduh da miet kaba la ktah ruh ia ka jingkhuid jong ka lyer bad ka sawdong sawkun. Katei ka jaka mynta ka sngi ka 30 tarik Iaiong ka la kylla sha ka jaka kaba itynnad ha kaba la thung ia ki phlang ba jyrngam bad la tah rong ruh ia ki kynroh kiba la sahkut jaboh da ki phew snem.
Katei ka kam ba bha jong ka SMB ka la wanrah ruh ia ka jingmyntoi ym tang ia ka khuid ka suba hapdeng jong ka Nongbah hynrei kaba la weng ruh ia ka jingeh jong ki nongleit nongwan namar katei ka jaka kaba don pyrshah ia ka MUDA Parking Lot ka dei kawei na ki ktem dih drok, khaïi drok, ka ktem dih kynja, jingdih Dendrite bad kiwei kiwei ki jingdih pynbuaid. Ia kane ka kam ba sniew la lap bad pynshisha ruh bunsien da ka Hynniewtrep Youth Council (HYC) kaba dei ruh ka kynhun kaba la bteng ban khynra drok ha ki thain 9Lad, Motphran bad ïewduh.
Kaba kham sngewtynnad halor kane ka khubor ka long ba ka SMB ka la pyndep ia katei ka kam tang hapoh shi miet. Ka SMB ka buh thong ban pynkhuid bad pynbha ruh ia ka Motphran kaba dei kawei na ka jaka theh ñiut khamtam ha ka por miet.
(Ka dur mynshwa)
(Ka dur mynta)