U Myntri ba dei peit ia ka tnat Tourism u bah Paul Lyngdoh ha ka sngi Saitjaiñ ula plie pyrda ia ka Cluster Development Fund Project kaba don ha Lum Symper, ha ka jingiadonlang u MLA ka thaiñ u bah Ollan Sun, u Dy CEM KHADC bah P.N Syiem, MDC ka thaiñ bah Alvin K Sawkmie, nongtrei jong ka MBMA, CLLMP bad kiwe de.
U bah Paul haba kren ha kane ka sngi ula iaroh eh ia ka Raid Saw Symper kaba la shim khia ban pynneh pynsah ia ka mei mariang. U la ong ka jingpynkynmaw ia baroh ba haba donkam ia ki kam pynroi dei ban wat ia ki jait jingpynroi kiba neh sah, ym kita ki kam pynroi kiba ioh lyngba ka jingpynjot ia ka mei mariang.
“Ngi kmen ban tip ba ki khlaw kiba tap ia ka jylla ki don kumba 76 %, hynrei ngi dei ban sngewthuh ba kum ki traishnong ba ka jingiadei kaba nyngkong eh jong ngi bad ka mariang bad ngin shim ia ka mariang kum la ka kmie” la ong shuh shuh u bah Paul.
U bah Paul u la ong ba ki nong Sohra ha ki por ba mynshwa ki shaniah ha ka kam rep kam riang, hadien kata ki phai khmat sha ka kam tih par, hynrei kine baroh ki long kiba lah ban shan slem ia ka jingdonkam jong ka jingim briew. Kumta ula ong ba ka dei tang ka kam jngohkai pyrthei (Tourism) kaba long ka kam kaba iaineh lynter bad kaba lah ban pynioh jingmyntoi ia ki nongshong shnong.
U la ong ruh ba ka long kaba donkam ban kyrsiew bad pynkynmaw ia ki samla bad kane ka pyrthei kaba ngi shong ngi sam kam dei satia ka jong ngi, hynrei ngi dei ban sumar bha ia ka bad ban aiti pat ia ka ha ki khun u ksiew kiba long ki pateng ban wan. U bah Paul u la kular ia ki nongialam jong ka Raid Saw Symper ba un iatreilang bad ki na ka bynta ban pynkhlaiñ bad ban pynneh pynsah ia kane ka jaka.
