Ka Hynñiewtrep Integrated Territorial Organization (HITO), West Jaiñtia Hills District haka jinglam khmat u Secretary samla Crissence Ksoo lem bad ki dkhot jong ka seng mynta ka sngi 15 tarik u Jymmang kila leit ban jurip ïa ka Namdong, Community Health Centre (CHC) kaba don hapoh ka West Jaiñtia Hills District.
Ha kane ka jingleit jurip ïa ka Namdong CHC ka seng kala lap ba ïa ka CHC Namdong “la pynkiew CHC thang ka ktien katba ki kam pat ka long da khong pong”, katkum ka jinglap jong ka Seng wat ka jaka test ECG, X-ray bad ka Ultrasound ruh kam pat don bad naka liang jong ki Staff Nurse ka seng ka lap ki don tang 5 (San) ngut wat ïa kito kiba la transfer ruh ym shem la pyndap ïa ka jaka jong ki.
Na ka liang ki Doctor ruh ki don tang lai ngut ha ka jingshisha ki dei ban don 6 ngut bad na ka liang ki jingthiah ruh ki don tang 26 tylli ki jingthiah, 13 tylli General bad 13 tylli ïa kiba kha khun, wat ka Ambulance ruh kim don namar ïa kaba don mynta ruh kam long shuh kaba ïaid beit bad ka don haka jingthut, lada jia ba don ki nongpang ba hap pynkit shawei ki hap ap Ambulance na kiwei kiwei ki jaka bad kane ka ktah shibun ïa ki nongpang kiba donkam Ambulance.
Lada phai pat sha u surok ka Seng kala lap ba kat ka CHC ruh kam pat ïoh ïa u surok rong bad ka long kaei kaei kaba pynsngewdiaw ïa kiba bun, na ka liang jong ka seng kala pynrem jur ïa kane ka sorkar ba pleng ka jingkyntiew CHC ïa ka Namdong ka long tang ban ïoh Vote ha ka por Election hynrei ka rukom trei kam jong ka CHC ka la long kum ka PHC hi.
Halor kane ka seng ka dawa na ka sorkar ba kan pynbiang ïa ki jingdon katkum ka CHC khnang ba ki 50 tylli ki shnong na katei ka thaiñ bad 35 hajar ngut ki nongshong shnong kiba dei peit hapoh ka CHC Namdong kin ïoh ïa ka jingsumar kaba biang.
