Hadien ka jingsniew ba shaba palat jong une u surok ba pyniasoh na u NH-40 (E) ban rung sha ka shnong Nongtalang na ka liang ka sorkar kala ioh ban maramot pynbha ia u kaba la wanrah ka jingkmen ia ki nongshong shnong. Hynrei wat hapdeng ka jingpyntrei ka dang iaid shakhmat bad ka por ban pyndep ruh kam pat poi la paw ki dak ki shin ba une u surok ula sniew ha kiba bun ki bynta.
Kumban shu pynkynmaw, ia une u surok la bei pisa da ka NABARD hapoh ka skhim Rural Infrastructure Development Fund kaba shongdor T.1,49,33,000/- (Shi klur Sawphew Khyndai Lak Laiphew Lai Hajar) tyngka ha ka jingjrong kaba 2.50 Km (Part-I). La pyntrei ia kane ka skhim da ka tnad PWD (Roads) jong ka sorkar jylla bad la sdang trei naduh ka 14 September 2021 kaba dei ban pyndep pat haduh ka 15 September 2022 ha ki ar tylli ki bynta jong ka Part I bad Part II. Haba kheiñlang ia ki jingpyntrei baroh ar ka NABARD kala pynioh jingiarap haduh T.1,95,00,000/- (Shi Klur Khyndai phew San Lak) tyngka.
Lada ka jingpyntrei da ki Contractor ka long ha kane ka rukom kan wanrah ka jingduhnong kaba khraw ia ki nongshong shnong jong ka Nongtalang, pynsngew ki nongshong shnong.